சர்வதேச அணு ஆயுத சோதனை எதிர்ப்பு தினமின்று!

மனித குலத்திற்கும் இயற்கைக்கும் பெரும் பேராபத்தை விளைவிக்கும் அணு ஆயுத சோதனைகளை முற்றிலும் நிறுத்துவதையும், அணு ஆயுதங்களற்ற பாதுகாப்பான உலகைப் படைப்பதையும் முதன்மை நோக்கமாகக் கொண்டு ஒவ்வொரு ஆண்டும் ஆகஸ்ட் 29 ஆம் தேதி சர்வதேச அணு ஆயுத சோதனை எதிர்ப்பு தினமாக உலகெங்கும் கடைப்பிடிக்கப்படுகிறது. அணுசக்தி பரிசோதனைகளால் ஏற்படும் பேரழிவுகள், பல தலைமுறைகளை அழிக்கும் கதிரியக்கச் சீரழிவுகள் மற்றும் சுற்றுப்புறச் சூழலுக்கு உண்டாகும் ஈடுசெய்ய முடியாத ஆபத்துகள் குறித்து உலக நாடுகளிடையே விழிப்புணர்வை ஏற்படுத்த வேண்டியது இன்றைய புவிசார் அரசியல் சூழலில் மிக அவசியமான ஒன்றாக மாறியுள்ளது.

கஜகஸ்தான் நாட்டின் வரலாற்று முடிவு மற்றும் ஐக்கிய நாடுகள் சபையின் பிரகடனம்

இந்த சர்வதேச தினம் பிரகடனப்படுத்தப்பட்டதன் பின்னணியில் ஒரு வரலாற்றுச் சிறப்புமிக்க மக்கள் போராட்டமும், தீர்க்கமான அரசியல் முடிவும் அமைந்திருக்கின்றன. சோவியத் ஒன்றியத்தின் ஆட்சிக் காலத்தில், கஜகஸ்தான் நாட்டின் நிலப்பரப்பில் அமைந்திருந்த செமிபாலடின்ஸ்க் (Semipalatinsk) அணு சோதனை களம் தான் உலகிலேயே மிக முக்கியமான மற்றும் கொடூரமான அணு ஆயுத பரிசோதனை மையமாக விளங்கியது. அங்கு நூற்றுக்கணக்கான நிலத்தடி மற்றும் வளிமண்டல அணு வெடிப்புச் சோதனைகள் எவ்வித மக்கள் பாதுகாப்பு நடவடிக்கைகளும் இன்றித் தொடர்ச்சியாக நடத்தப்பட்டு வந்தன. சோவியத் ஒன்றியம் கலைக்கப்பட்டதைத் தொடர்ந்து, கஜகஸ்தான் நாட்டின் அதிபர் நூர்சுல்தான் நாசர்பயேவ் 1991 ஆம் ஆண்டு ஆகஸ்ட் 29 ஆம் தேதி வரலாற்றுச் சிறப்புமிக்க ஒரு அரசாணையைப் பிறப்பித்து, அந்த செமிபாலடின்ஸ்க் அணு சோதனை களத்தை நிரந்தரமாக மூடி உத்தரவிட்டார். இந்த அமைதி நடவடிக்கையை கௌரவிக்கும் விதமாகவும், உலகளாவிய அணு ஆயுத ஒழிப்பை வலியுறுத்தும் நோக்கிலும், கஜகஸ்தான் முன்மொழிந்த தீர்மானத்தை (Resolution 64/35) ஏற்று 2009 ஆம் ஆண்டு டிசம்பர் 2 ஆம் தேதி ஐக்கிய நாடுகள் பொதுச் சபை ஆகஸ்ட் 29 ஆம் தேதியை ‘சர்வதேச அணு ஆயுத சோதனை எதிர்ப்பு தினமாக’ ஏகமனதாகப் பிரகடனம் செய்தது.

வரலாற்றில் நிகழ்ந்த அணு ஆயுத சோதனைகளும் அதன் பயங்கரங்களும்

உலக வரலாற்றின் கருப்புப் பக்கங்களை திருப்பினால், 1945 ஆம் ஆண்டு ஜூலை 16 ஆம் தேதி அமெரிக்காவின் நியூ மெக்சிகோ பாலைவனத்தில் ‘டிரினிட்டி’ (Trinity) என்ற பெயரில் நடத்தப்பட்ட முதல் அணு ஆயுத சோதனையே அணு உலை ஆபத்துகளுக்கான தொடக்கப்புள்ளியாக அமைந்தது. அதனைத் தொடர்ந்து வந்த தசாப்தங்களில் வல்லரசு நாடுகளுக்கு இடையே தங்களின் ராணுவ பலத்தைக் காட்ட அணு ஆயுதங்களை தயாரிப்பதிலும் பரிசோதிப்பதிலும் கடுமையான போட்டியும் பனிப்போரும் வெடித்தன. 1945 முதல் இதுவரை உலகளவில் 2,000க்கும் மேற்பட்ட சிறிய மற்றும் பெரிய அளவிலான அணு ஆயுத சோதனைகள் நடத்தப்பட்டுள்ளன. வளிமண்டலம், நிலத்தடி மற்றும் பெருங்கடல்களுக்கு அடியில் என பல வடிவங்களில் நடத்தப்பட்ட இந்த சோதனைகள், பூமியின் பல்வேறு சுற்றுச்சூழல் மண்டலங்களில் கடுமையான கதிரியக்க மாசுபாட்டைப் புகுத்தின. பசிபிக் பெருங்கடலில் உள்ள பிகினி அடோல் தீவுகளில் அமெரிக்கா நடத்திய அதிபயங்கர சோதனைகள் தொடங்கி, சோவியத் ஒன்றியம் நடத்திய மனித வரலாற்றின் மிகப்பலமான ‘சார் போம்பா’ (Tsar Bomba) ஹைட்ரஜன் பாம் சோதனை வரை அனைத்தும் பூமிக்கு மீட்டெடுக்க முடியாத வடுக்களையே பரிசாக அளித்துள்ளன.

மனித உடல்நலம் மற்றும் சுற்றுச்சூழலில் ஏற்படும் கதிரியக்கப் பாதிப்புகள்

அணு ஆயுத சோதனைகள் என்பது வெறும் தற்காலிக வெடிப்புச் சத்தத்தோடோ அல்லது அந்த இடத்தின் அழிவோடோ முடிந்துவிடும் ஒன்று அல்ல. அவை தலைமுறை தலைமுறையாக மரபணு வழியாகத் தொடரும் கொடூரமான கதிரியக்கப் பாதிப்புகளை மனித குலத்திற்கு விட்டுச் செல்கின்றன. செமிபாலடின்ஸ்க் மற்றும் பசிபிக் தீவுப் பகுதிகளைச் சுற்றியுள்ள லட்சக்கணக்கான அப்பாவி மக்கள் கடுமையான கதிரியக்க வீச்சுக்கு ஆளானார்கள். இதன் விளைவாக அப்பகுதியில் பிறக்கும் குழந்தைகளுக்குப் பிறவி ஊனங்கள், புற்றுநோய் பாதிப்புகள், தைராய்டு கோளாறுகள் மற்றும் விவரிக்க முடியாத மரபணு மாற்றங்கள் பல தலைமுறைகளாகத் தொடர்ந்து வருகின்றன. அணு சோதனைகளால் வளிமண்டலத்தில் உயரும் கதிரியக்கத் துகள்கள் மழை, காற்று மற்றும் மண் வழியாக உணவுச் சங்கிலிக்குள் நுழைந்து மனித உடலை மெல்லக் கொல்லும் நஞ்சாக மாறுகின்றன. நிலத்தடியில் செய்யப்படும் சோதனைகள் கூட நிலத்தடி நீர் வளத்தை நச்சுமயமாக்கி, பூகம்பங்களை தூண்டும் பேராபத்தைக் கொண்டுள்ளன.

முழுமையான அணு சோதனை தடை ஒப்பந்தம் (CTBT) மற்றும் தற்போதைய சவால்கள்

அணு ஆயுத சோதனைகளை சர்வதேச அளவில் சட்டப்பூர்வமாகத் தடை செய்து, அணு சக்தியை அமைதி வழியில் மட்டுமே பயன்படுத்தும் நோக்கில் 1996 ஆம் ஆண்டு உருவாக்கப்பட்டது தான் ‘முழுமையான அணு சோதனை தடை ஒப்பந்தம்’ (Comprehensive Nuclear-Test-Ban Treaty – CTBT) ஆகும். இந்த ஒப்பந்தம் உலகெங்கிலும் எந்தவொரு சூழலிலும் அணு ஆயுதப் பரிசோதனைகளை நடத்துவதை முற்றிலும் தடை செய்கிறது. இருப்பினும், இந்த ஒப்பந்தம் உருவாக்கப்பட்டு பல ஆண்டுகள் கடந்தும் இன்னும் முழுமையாக அமலுக்கு வரவில்லை என்பது சர்வதேச சமூகத்தின் மிகப்பெரிய பின்னடைவாகக் கருதப்படுகிறது. ஒப்பந்தம் நடைமுறைக்கு வர தேவையான முக்கிய 44 அணு தொழில்நுட்ப நாடுகளின் பட்டியலில் உள்ள அமெரிக்கா, சீனா, எகிப்து, ஈரான், இஸ்ரேல் போன்ற நாடுகள் இதை இன்னும் ஒப்புவிக்காமல் இழுத்தடித்து வருகின்றன. மேலும் இந்தியா, பாகிஸ்தான் மற்றும் வட கொரியா ஆகிய நாடுகள் இதில் கையெழுத்திடவே இல்லை. இதில் வட கொரியா 21 ஆம் நூற்றாண்டிலும் தொடர்ந்து அணு ஆயுத சோதனைகளை நடத்தி உலகப் பாதுகாப்புக்கே சவால் விடுத்து வருகிறது.

அணு ஆயுதங்களற்ற எதிர்காலத்தை நோக்கிய உலகளாவிய தேவை

இன்றைய நவீன புவிசார் அரசியல் சூழலில், வல்லரசு நாடுகளுக்கு இடையேயான எல்லைப் போர்களும் ராஜதந்திரப் பதற்றங்களும் அதிகரித்து வரும் நிலையில், அணு ஆயுத பயன்பாடு குறித்த அச்சுறுத்தல் மீண்டும் பூதாகரமாக உருவெடுத்துள்ளது. அணு ஆயுத சோதனைகளை முற்றிலும் தடுப்பது என்பது உலகளாவிய அணு ஆயுத ஒழிப்பை நோக்கிய பயணத்தின் முதல் மற்றும் மிக முக்கியமான படியாகும். சுற்றுச்சூழல் பாதுகாப்பு, மனித உரிமைகள் மற்றும் நமது எதிர்காலத் தலைமுறையின் நல்வாழ்வை உறுதி செய்ய உலக நாடுகள் குறுகிய அரசியல் லாபங்களைத் கடந்து அணு சோதனைகளுக்கு முற்றுப்புள்ளி வைக்க வேண்டும். ஆகஸ்ட் 29 ஆம் தேதி அனுசரிக்கப்படும் இந்த சர்வதேச தினம், போர் அச்சுறுத்தலற்ற அமைதியான மற்றும் பாதுகாப்பான உலகத்தை உருவாக்க ஒன்றுபட வேண்டும் என்ற அழுத்தமான நினைவூட்டலாக அமைகிறது.

நிலவளம் ரெங்கராஜன்