செய்தியைக் கேட்க / Listen to News
மெட்டா நிறுவனத்தின் இன்ஸ்டாகிராம் தளத்தில் சமீபகாலமாக புகைப்படங்களுக்கு அளிக்கப்படும் AI கண்டென்ட் (AI Content) முத்திரை, உலகளாவிய பயனர்கள் மற்றும் புகைப்படக் கலைஞர்களிடையே பெரும் கொந்தளிப்பை ஏற்படுத்தியுள்ளது. நிஜமாகவே கேமரா மூலம் எடுக்கப்பட்டு, லேசான கலர் கரெக்ஷன் அல்லது லைட்டிங் திருத்தங்கள் மட்டுமே செய்யப்பட்ட புகைப்படங்களுக்கும் ‘ஏஐ உருவாக்கப்பட்டது’ என்ற முத்திரையை மெட்டாவின் அல்காரிதம் தவறாகக் குத்தி வருகிறது. அதேநேரத்தில், முழுக்க முழுக்க ஏஐ தொழில்நுட்பத்தால் உருவாக்கப்பட்ட பல போலிப் படங்கள் எந்தவித அடையாளமுமின்றி மிக எளிதாகத் தப்பித்து உலா வருகின்றன. பிக்சல்களின் நிஜத் தன்மையையோ அல்லது புகைப்படத்தின் உண்மையான உள்ளடக்கத்தையோ நேரடியாக ஆராயாமல், கோப்புகளின் பின்னணியில் இருக்கும் மறைமுகத் தரவுகளை (Metadata) மட்டுமே மெட்டா கண்மூடித்தனமாகச் சார்ந்து இயங்குவதே இந்த ஒட்டுமொத்த குளறுபடிக்கும் முதன்மைச் காரணமாக அமைந்திருக்கிறது.
மெட்டா கண்காணிக்கும் முதன்மை சிக்னல்கள்
மெட்டாடேட்டா மற்றும் டிஜிட்டல் கையொப்பங்கள்
புகைப்படத்தின் பிக்சல்களை நேரடியாக ஆய்வு செய்வதற்குப் பதிலாக, பதிவேற்றப்படும் கோப்பில் உள்ள மறைமுகத் தரவுகளையே (Metadata) மெட்டா பிரதானமாக நம்பியிருக்கிறது.
சிடூபிஏ (C2PA – Content Credentials): அடோப், மைக்ரோசாப்ட், ஓபன்ஏஐ போன்ற நிறுவனங்களின் மென்பொருள்கள் மூலம் உருவாக்கப்படும் அல்லது திருத்தப்படும் கோப்புகளில் இந்த டிஜிட்டல் கையொப்பம் பதிவாகிறது.
ஐபிடிசி (IPTC) குறியீடுகள்: புகைப்படத்தில் சிறிய மாற்றம் செய்தாலும், மென்பொருள்கள் அதில் trainedAlgorithmicMedia என்ற ரகசியக் குறியீட்டைச் சேர்த்துவிடும்.
ஃபோட்டோஷாப் அல்லது லைட்ரூம் மூலம் ஒரு நிஜப் புகைப்படத்தில் உள்ள தேவையற்ற தூசியையோ அல்லது பின்னணியையோ நீக்க ஏஐ கருவிகளைப் (Generative Fill) பயன்படுத்தினால், அந்த முழுக் கோப்பிலும் ஏஐ பயன்படுத்தப்பட்டதாக இந்த மெட்டாடேட்டா பதிவாகிவிடுகிறது. இதனால்தான் கேமராவில் எடுக்கப்பட்ட நிஜ புகைப்படங்களுக்கும் இன்ஸ்டாகிராம் தானாகவே ஏஐ முத்திரை குத்துகிறது.
டிஜிட்டல் நீர்க்குறிகள் (Watermarks)
ஏஐ உருவாக்கிகளால் உருவாக்கப்படும் படங்களில் கண்ணுக்குத் தெரியாத அல்லது பிக்சல்களுக்குள் மறைக்கப்பட்ட டிஜிட்டல் நீர்க்குறிகள் பயன்படுத்தப்படுகின்றன. கூகுளின் SynthID அல்லது அடோப்பின் Firefly போன்ற நீர்க்குறிகளை மெட்டாவின் தானியங்கி அமைப்புகள் கண்டறிந்தவுடனே, அந்தப் படத்திற்கு ஏஐ லேபிளை ஒட்டிவிடுகின்றன.
பயனர் சுய தகவல்கள் (Self-Disclosure)
பயனர்கள் உள்ளடக்கம் பதிவேற்றும்போது, வெளிப்படைத்தன்மை கொள்கைக்காக தாங்களாகவே ஏஐ பயன்படுத்தியதாகக் குறிப்பிடும் தேர்வை மெட்டா வழங்கியுள்ளது.
காட்சி சார்ந்த அல்காரிதம் பகுப்பாய்வு (Visual Pattern Analysis)
படங்களின் பிக்சல் அமைப்புகளை ஆராய்ந்து, மனித தோல் அமைப்பு, வெளிச்சத்தின் பிரதிபலிப்பு, பின்னணி முரண்பாடுகள் ஆகியவற்றைக் கொண்டு ஏஐ படங்களை அடையாளம் காணும் நுட்பத்தையும் மெட்டா பரிசோதித்து வருகிறது.
உண்மையான ஏஐ படங்கள் தப்புவது எப்படி?
ஓபன் சோர்ஸ் ஏஐ கருவிகளைப் (Open-source AI tools) பயன்படுத்தி உருவாக்கப்படும் படங்களில் சிடூபிஏ போன்ற மெட்டாடேட்டா கையொப்பங்களோ அல்லது நீர்க்குறிகளோ இருப்பதில்லை. மேலும், ஏஐ படங்களை ஸ்கிரீன்ஷாட் எடுத்தோ அல்லது மெட்டாடேட்டாவை நீக்கியோ பதிவேற்றும்போது, மெட்டாவின் தற்காப்பு அமைப்புகள் எளிதாக ஏமாற்றப்பட்டு விடுகின்றன.
படங்களின் உண்மையான உள்ளடக்கத்தை ஆராயாமல், அவற்றின் பின்னணியில் உள்ள தொழில்நுட்பத் தரவுகளை மட்டுமே மெட்டா சார்ந்து இயங்குவதால்தான் இந்தத் தவறான லேபிளிங் குழப்பங்கள் தொடர்ந்து நிகழ்கின்றன.
