👶 பச்சிளம் குழந்தைகள் பாதுகாப்பு தினம்: நாளைய இந்தியக் குடிமக்களை வளர்த்தெடுக்கும் வழிகாட்டி!

துயரங்கள் அனைத்தையும் பனி போல விலக்கும் சக்திகொண்டவர்கள் குழந்தைகள். அவர்களிலும், புதிதாகப் பிறந்த பச்சிளம் குழந்தைகள் சுமந்து வரும் சந்தோஷத்திற்கும், ஆச்சரியங்களுக்கும் எல்லையே இல்லை. இந்த உலகின் வருங்கால எதிர்காலமான பச்சிளம் குழந்தைகளைப் பாதுகாத்து, ஊக்குவித்து, ஆரோக்கியமாக வளர்ப்பது குறித்த விழிப்புணர்வை ஏற்படுத்தும் வகையில் ஆண்டுதோறும் நவம்பர் 7-ம் தேதி “பச்சிளம் குழந்தைகள் பாதுகாப்பு தினம்” கடைப்பிடிக்கப்படுகிறது.

குழந்தைகளின் உடல் மற்றும் மன வளர்ச்சியைப் புரிந்துகொண்டு பெற்றோர்கள் செயல்படுவது, அவர்களின் நலனுக்கு மிகவும் இன்றியமையாதது.

⚖️ ஆரோக்கியமான பிறப்பும் உடல் பராமரிப்பும்

குழந்தை ஆரோக்கியமாக வளர, கர்ப்ப காலத்தில் சீரான உடல் எடையும், மன வளர்ச்சியும் உறுதி செய்யப்பட வேண்டும்.

• சரியான எடை: பிறந்த குழந்தை 2.5 முதல் 3.9 கிலோ வரை இருப்பது சரியான எடையாகும்.
• ஆரோக்கிய அறிகுறி: குழந்தை பிறந்தவுடன் நன்றாக அழுது, கை, கால்களை அசைத்தால், குழந்தையின் உடல் மற்றும் நரம்பு மண்டல இயக்கம் சரியாக உள்ளது என அறியலாம்.
• உடல் வெப்பப் பராமரிப்பு:
  • வெயில் காலம்: மெலிதான காட்டன் உடைகள் அணிவித்து, அறையை காற்றோட்டமாக வைத்திருக்க வேண்டும்.
  • குளிர்காலம்: குழந்தையின் உடல் வெப்பம் குறையாமல் இருக்க நன்றாகப் போர்த்தி, தலைக்குக் குல்லா, கை கால்களுக்கு உறை அணிவிப்பது அவசியம்.

💤 தூக்கத்தின் முக்கியத்துவம்

பச்சிளம் குழந்தைகளின் வளர்ச்சிக்கு, ஆரம்ப காலத்தில் போதுமான மற்றும் சரியான தூக்கம் மிகவும் முக்கியமானது.

• தூங்கும் நேரம்: பிறந்த குழந்தைகள் ஒரு நாளைக்கு 12 முதல் 16 மணிநேரம் வரை தூங்குவார்கள். போதுமான தூக்கம் குழந்தையின் மூளையின் சரியான செயல்பாட்டை ஊக்குவிக்கிறது.
• இரவு/பகல் குழப்பம்: பெரும்பாலான குழந்தைகளுக்கு 3 மாதங்கள் வரை இரவு/பகல் வித்தியாசம் தெரியாது. எனவே, பகலில் அறையை வெளிச்சமாகவும் காற்றோட்டமாகவும் வைத்திருக்க வேண்டும்.
• தாய்ப்பாலுக்காக எழுப்ப வேண்டும்: புதிதாகப் பிறந்த குழந்தைகள் நீண்ட நேரம் தூங்கினால், அவர்களின் ஊட்டச்சத்துக்காக ஒவ்வொரு 3 முதல் 4 மணி நேரத்திற்கு ஒரு முறை தாய்ப்பால் கொடுக்க எழுப்புவது அவசியம்.
• தூங்கும் வழக்கம்: தூங்கும் முன் டயபர் மாற்றுவது, உடை மாற்றுவது, மெல்லிய இசை அல்லது தாலாட்டு பாடுவது, உணவளிப்பது மற்றும் அரவணைப்பது போன்ற ஒரு படுக்கை நேர வழக்கத்தைத் (Bedtime Routine) தொடங்குவது நல்லது.

🤱 தாய்ப்பால்: ஆரோக்கியத்தின் முதல் அரண்

குழந்தையின் பிறந்த அரை மணி நேரத்திற்குள் தாய்ப்பால் கொடுக்கத் தொடங்க வேண்டும். தாய்ப்பாலைத் தவிர வேறு எந்த நீர் ஆகாரமும் கொடுக்கக் கூடாது.

• கொலஸ்ட்ரம் (Colostrum): குழந்தை பிறந்த முதல் 2 முதல் 5 நாட்கள் வரை சுரக்கும் மஞ்சள் நிறப் பால், ‘கொலஸ்ட்ரம்’ எனப்படும். இதில் அதிகப் புரதம், வைட்டமின் மற்றும் ஊட்டச்சத்துக்கள் நிறைந்துள்ளன. இது குழந்தைக்கு உடல் இயக்கத்திற்கான சக்தியையும், மிக உயர்ந்த எதிர்ப்பு சக்தியையும் கொடுக்கிறது.
• தாய்க்கு நன்மை: தாய்ப்பால் கொடுப்பதால் தாய்க்கு மார்பகப் புற்றுநோய், கருப்பை புற்றுநோய் போன்ற பல நோய்கள் வராமல் தடுக்கப்படுகின்றன. உடல் அழகு கெடும் என்பது உண்மையல்ல; ஆரோக்கியமான உணவு மற்றும் உடற்பயிற்சிதான் உடல் அழகைக் கூட்டும்.
• குழந்தைக்கு நன்மை: சீரான உடல் எடை, நோய் எதிர்ப்பு சக்தி, மூளை வளர்ச்சி, அலர்ஜி நோய்த் தடுப்பு போன்ற பல நன்மைகள் குழந்தைக்குக் கிடைக்கின்றன.

தாய்ப்பால் போதுமானதா என்று அறிய:

1. ஒரு நாளில் 8-12 முறை தாய்ப்பால் கொடுக்க வேண்டும்.
2. ஒரு மார்பகத்தில் முழுவதுமாகப் பால் கொடுத்த பின்னரே, அடுத்த மார்பகத்தில் கொடுக்க வேண்டும்.
3. குழந்தையின் எடை சீராகக் கூடினால், போதுமான பால் கிடைக்கிறது என்று அர்த்தம்.

முக்கியக் குறிப்பு: தாய்ப்பால் கொடுத்தபின், குழந்தை பால் கக்குவதைத் தவிர்க்க, தோளில் போட்டு முதுகில் மெதுவாகத் தட்டிக்கொடுக்க வேண்டும். கர்ப்ப காலத்திலேயே தாய்ப்பால் சுரக்க உண்ண வேண்டிய உணவுகள் மற்றும் கொடுக்கும் முறைகள் பற்றி அறிவது தாய்க்குத் தன்னம்பிக்கை அளிக்கும்.

💖 குழந்தையின் வளர்ச்சி மைல்கற்கள் மற்றும் விளையாட்டுக்கள்

பிறந்த குழந்தையின் உடல் மற்றும் மன வளர்ச்சிக்குத் தூண்டுதல் அளிக்கும் பயிற்சிகள் அவசியம்.

1. டயபர் மற்றும் குளியல்:

• டயபர்: காட்டன் டயபர்கள் சிறந்தது. 3 மணி நேரத்திற்கு ஒருமுறை டயபரை மாற்றுவது அவசியம். புதிய டயபரை மாற்றுவதற்கு முன் குழந்தையின் தோல் பகுதியை நன்றாக உலரவிட வேண்டும்.
• குளியல்: குழந்தை பிறந்த 24 மணி நேரம் குளிக்க வைக்கத் தேவையில்லை. பின்னர் வாரத்தில் 2 அல்லது 3 முறை வெதுவெதுப்பான நீரில் குளிக்க வைக்கலாம். குளிப்பதற்கு முன் தேங்காய்/நல்லெண்ணெய் தேய்த்து மசாஜ் செய்யலாம்.

2. ஆரம்பகால மைல்கற்கள்:

• அழுகும் போது அரவணைத்தால் அமைதியாகிவிடும்.
• பெற்றோரின் முகத்தை உற்று நோக்கும்.
• உரத்த சத்தத்திற்குக் காது கொடுத்து எதிர்வினையாற்றும்.
• தன் கைகால்களை நன்றாக அசைக்கும்.

3. விளையாட்டுகள் மூலம் வளர்ச்சி:

🛡️ நம்பிக்கையே முதல் பாதுகாப்பு

குழந்தை அழும்போது பெற்றோர் அரவணைத்து ஆறுதல் படுத்துவது, குழந்தைக்கு உலகத்தின் மீதுள்ள நம்பிக்கையை (Trust) ஏற்படுத்துகிறது. இந்த நம்பிக்கைதான் நாளைய ஆரோக்கியமான குடிமகனை உருவாக்குவதற்கான முதல் அடியாகும்.

தனுஜா