இந்தியா AI இம்பாக்ட் சமிட் 2026:ஏஐ புரட்சியும்..எழும் வாழ்வாதாரச் சிக்கல்களும்!

புது டெல்லியில் நடைபெற்று வரும் ‘இந்தியா AI இம்பாக்ட் சமிட் 2026’ (India AI Impact Summit 2026) நிகழ்வின் இரண்டாம் நாளில், மத்திய மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் முக்கிய அறிவிப்புகளை வெளியிட்டார்.

அமைச்சரின் உறுதிமொழி: மனிதாபிமான அடிப்படையிலான ஏஐ

மருத்துவம் மற்றும் கல்வி ஆகிய துறைகளில் செயற்கை நுண்ணறிவை (AI) பொறுப்புடன் பயன்படுத்துவதில் இந்தியா கவனம் செலுத்தும் என்றும், இந்தத் தொழில்நுட்பம் அனைவருக்கும் பயன்படுவதை உறுதி செய்வதே பிரதமர் நரேந்திர மோடியின் தொலைநோக்கு பார்வை என்றும் அமைச்சர் குறிப்பிட்டார். தொழில்நுட்பத்தை ஜனநாயகப்படுத்துவதே இந்தியாவின் நோக்கம் என்றார் அவர்.

ஒளிந்திருக்கும் சவால்கள்

அமைச்சரின் பேச்சு நம்பிக்கையளிக்கும் வகையில் இருந்தாலும், ‘AI Now Institute’ போன்ற தன்னாட்சி ஆராய்ச்சி நிறுவனங்கள் சில கசப்பான உண்மைகளைச் சுட்டிக்காட்டுகின்றன. இந்தியா உலகளவில் ஏஐ தலைவராக தன்னை முன்னிறுத்திக் கொள்ள ஆசைப்பட்டாலும், முக்கியமான உள்கட்டமைப்பு மற்றும் கண்டுபிடிப்புகளுக்கு இன்னும் ‘பிக் டெக்’ (Big Tech) நிறுவனங்களையே சார்ந்திருப்பது ஒரு பெரிய முட்டுக்கட்டையாக இருப்பதாகத் தெரிவிக்கப்படுகிறது.

வேலைவாய்ப்பும் ‘டார்க் பேக்டரிகளும்’ (Dark Factories)

21-ஆம் நூற்றாண்டின் ஏஐ மற்றும் ரோபாட்டிக்ஸ் தொழில்நுட்பங்கள் மனித உழைப்பை முழுமையாக நீக்கிவிடுமோ என்ற அச்சத்தை ஏற்படுத்தியுள்ளன. இதற்கு உதாரணமாக காஞ்சிபுரத்தில் உள்ள ‘பாலிமேடெக்’ (Polymatech) தொழிற்சாலையைக் கூறலாம். இங்கே ரோபோக்கள் மனித மேற்பார்வையின்றி 24 மணி நேரமும் செமிகண்டக்டர் சிப்புகளைத் தயாரிக்கின்றன. ஊடகங்கள் இதைப் பாராட்டித் தள்ளினாலும், சாமானிய உழைக்கும் வர்க்கத்தின் கதி என்ன என்ற கேள்விக்கு விடை இல்லை.

தொழிலாளர் சட்டங்களும் ‘கிக்’ (Gig) தொழிலாளர்களும்

ஏஐ தொழில்நுட்பத்தை ‘ஐந்தாம் தொழில் புரட்சி’ என்று அழைக்கும் அமைச்சர், இதற்காகத் தொழிலாளர் சந்தையில் ‘நெகிழ்வுத்தன்மை’ அவசியம் என்கிறார். அதாவது, நிறுவனங்கள் எப்போது வேண்டுமானாலும் தொழிலாளர்களை வேலையை விட்டு நீக்கலாம் என்ற நிலையை அரசு உருவாக்குகிறது.

• ஏற்கனவே கிக் தொழிலாளர்கள் (Gig workers), இந்த ஏஐ அல்காரிதம் நிர்வாகத்தால் (Algorithm Management) கடுமையாகப் பாதிக்கப்பட்டுள்ளனர்.

• அவர்களின் ரேட்டிங் குறையும்போது, விளக்கம் கேட்கும் வாய்ப்பின்றி வேலையிலிருந்து வெளியேற்றப்படுகிறார்கள்.

விவசாயமும் இயற்கை வளங்களும்

ஏஐ தொழில்நுட்பத்திற்காக அமைக்கப்படும் ‘டேட்டா சென்டர்கள்’ (Data Centres) மிக அதிகமான மின்சாரம் மற்றும் தண்ணீரை உறிஞ்சுகின்றன.

• ஒரு ஏஐ தேடல் (Query), சாதாரண தேடலை விட 10 மடங்கு கூடுதல் மின்சாரத்தைச் சாப்பிடுகிறது.

• பெங்களூரு போன்ற தண்ணீர் தட்டுப்பாடு உள்ள நகரங்களில், டேட்டா சென்டர்கள் நாளொன்றுக்கு சுமார் 80 லட்சம் லிட்டர் தண்ணீரை மேலாண்மை செய்யப் பயன்படுத்துகின்றன.

• மகாராஷ்டிரா, தெலுங்கானா மற்றும் தமிழகம் போன்ற நீர் நெருக்கடி உள்ள மாநிலங்களில்தான் 80% டேட்டா சென்டர்கள் அமைந்துள்ளன என்பது கவலைக்குரிய விஷயம்.

தொழில்நுட்பப் புரட்சி என்பது அடித்தட்டு மக்களின் வாழ்க்கையை மேம்படுத்துவதற்குப் பதிலாக, பெரும் செல்வந்தர்களின் கைகளில் இன்னும் அதிகச் செல்வத்தைக் குவிக்கும் கருவியாக மாறிவிடுமோ என்ற கவலை நிபுணர்களிடையே எழுந்துள்ளது.