310 வயதான திருப்பதி லட்டின் சுவையான வரலாற்றுக் குறிப்புகள்!
இந்தியாவின் பணக்கார கடவுளாக இருப்பவர் திருப்பதி ஏழுமலையான். திருப்பதி கோயிலுக்கு தினமும் லட்சக்கணக்கான பேர் சாமி தரிசனம் செய்து வருகின்றனர். திருப்பதிக்கு சென்று வந்தால், திருப்பம் ஏற்படும், கேட்டதை கொடுக்கும் கலியுக தெய்வம் என்பது அனைவருக்கும் தெரியும். மேலும் திருப்பதிக்குச் சென்று வந்தால், “லட்டு வாங்கி வந்தீர்களா?” என்று கேட்காதவர்களே இருக்க மாட்டார்கள்.1715-ம் ஆண்டு ஆகஸ்ட் 2-ம் தேதியிலிருந்து ஏழுமலையானுக்கு லட்டு நைவேத்தியம் படைக்கப்படுகிறது. 1803-ம் ஆண்டு முதல் பக்தர்களுக்கு பிரசாதமாக பூந்தி வழங்கப்பட்டு வந்தது. எட்டு அணாவுக்கு ஒரு லட்டு என்று விற்கத் தொடங்கிய லட்டு இன்று 50 ரூபாய் என விலை உயர்ந்துவிட்டது; அளவும் குறைந்துவிட்டது. ஆனாலும், சுவையும் மணமும் மாறாமல் திருமலையான் அருள் போலவே பக்தர்களைச் சொக்கவைக்கிறது. உலகப் புகழ்பெற்ற இந்த ஸ்ரீவாரி லட்டின் சுவை, வெறும் இனிப்பு மட்டுமல்ல, மூன்று நூற்றாண்டுகளுக்கும் மேலான வரலாறு, பக்தி, மற்றும் பாரம்பரியத்தின் கலவை. திருப்பதி லட்டு உருவான கதையைப் பற்றிப் பல சுவாரஸ்யமான தகவல்கள் உள்ளன.
பூந்தி முதல் லட்டு வரை
பெருமாளை தரிசித்த பிறகு சில நாட்கள் மலையிலேயே தங்கி, பிறகு ஊர் திரும்புவது பக்தர்களின் வழக்கம். அவர்கள் வீடுகளுக்குச் செல்லும் வரை பசியைப் போக்க கோவில் பிரசாதங்கள் வழங்கப்பட்டன. ஆரம்பத்தில், இந்த பிரசாதம் திருப்பொங்கல் என்று அழைக்கப்பட்டது.
காலப்போக்கில், இரண்டாம் தேவராயர் காலத்தில், பெருமாளுக்குப் படைக்கப்படும் நைவேத்தியங்களின் எண்ணிக்கை பெருகியது. அப்போதுதான், ஸ்ரீவாரி நைவேத்திய சமயம் என்ற முறை உருவானது. அந்த நாட்களில், திருமலையில் உணவகங்கள் அதிகம் இல்லாததால், பிரசாதங்களே பக்தர்களுக்கு உணவாக இருந்தன. பின்னர் அதிரசம், அப்பம், வடை, மனோகரம், பொடி போன்ற பிரசாதங்கள் தயாரிக்கப்பட்டன.
ஆனால், இந்தப் பிரசாதங்கள் வெகுநாட்கள் தாங்காது. எனவே, நீண்ட நாட்கள் கெடாமல் இருக்கும் ஒரு பிரசாதத்தைத் தேடினர். அப்போது, 1803-ம் ஆண்டு முதல், லட்டு பிடிப்பதற்கு முன் இருக்கும் பூந்தி இனிப்பு பக்தர்களுக்கு வழங்கப்பட்டது. இந்த பூந்தி இனிப்புதான், நாளடைவில் லட்டுவாக உருமாறியது.
லட்டு பிரசாதம் உருவான கதை
லட்டை ஒரு முக்கியமான பிரசாதமாக மாற்றிய பெருமை, ஸ்ரீமான் பூதேரி பத்தங்கி சீனிவாச ராகவன் என்பவரையே சேரும். இவர் அன்புடன் கல்யாணம் அய்யங்கார் என்று அழைக்கப்பட்டார். இவர், திருப்பதி ஏழுமலையானுக்குக் கைங்கர்யங்கள் செய்வதையே தன் வாழ்நாள் பணியாகக் கொண்டிருந்தார்.
ஒருமுறை, ஒரு பெரிய செல்வந்தர் தன் வேண்டுதல் நிறைவேறினால், பெருமாளின் திருக்கல்யாண உற்சவத்தில் பக்தர்களுக்குப் பிரம்மாண்டமான லட்டைப் பிரசாதமாக வழங்குவதாக வேண்டிக்கொண்டார். அவருடைய வேண்டுதல் நிறைவேறியதும், அவர் கூறியபடி லட்டு தயாரிக்கப்பட்டது. இந்தச் சம்பவமே லட்டு பிரசாதம் உருவானதற்கு ஒரு காரணமாகச் சொல்லப்படுகிறது.
மூன்று வகை லட்டுகள்
திருப்பதியில் மூன்று வகையான லட்டுகள் தயாரிக்கப்படுகின்றன.
- ஆஸ்தான லட்டு: 750 கிராம் எடை கொண்ட இந்த லட்டு, முக்கியமான திருவிழா நாட்களில் மட்டுமே தயாரிக்கப்படுகிறது. இதில் குங்குமப்பூ, முந்திரி, மற்றும் பாதாம் போன்ற பொருட்கள் அதிகம் சேர்க்கப்படுகின்றன.
- கல்யாண உற்சவ லட்டு: கல்யாண உற்சவ சேவையில் பங்கேற்கும் பக்தர்களுக்கு வழங்கப்படும் லட்டு இது. இதன் எடையும் 750 கிராம் ஆகும்.
- புரோக்தம் லட்டு: இதுவே சாதாரணமாக தரிசனத்திற்கு வரும் அனைத்து பக்தர்களுக்கும் வழங்கப்படும் லட்டு. இதன் எடை 175 கிராம்.
ஸ்ரீவாரி லட்டின் சிறப்பு
- பவித்திரமான தயாரிப்பு: இந்த லட்டு, திருமலை கோவில் வளாகத்தில் உள்ள பொட்டு எனப்படும் மடப்பள்ளியில், கார்மீகலு எனப்படும் பிரத்யேகப் பணியாளர்களால் தயாரிக்கப்படுகிறது. இதில், கடலை மாவு, கல்கண்டு, சர்க்கரை, ஏலக்காய், பசு நெய், முந்திரி, உலர் திராட்சை, குங்குமப்பூ ஆகியவை சரியான விகிதத்தில் பக்தியுடன் கலந்து செய்யப்படுகின்றன.
- புவிசார் குறியீடு: கடந்த 2009-ம் ஆண்டு, திருப்பதி லட்டுக்கு புவிசார் குறியீடு (Geographical Indication – GI) வழங்கப்பட்டது. இதன்மூலம், இதன் தனித்தன்மை மற்றும் பிரத்தியேகமான தயாரிப்பு முறைக்கு சட்டப்பூர்வ அங்கீகாரம் கிடைத்தது.
- ஆரம்பமும் வளர்ச்சியும்: முதன்முதலில், ஆகஸ்ட் 2, 1715 அன்று பெருமாளுக்கு லட்டு நைவேத்தியம் செய்யப்பட்டது. 1940-ம் ஆண்டு முதல் பக்தர்களுக்குப் பிரசாதமாக வழங்கத் தொடங்கப்பட்டது. அன்று எட்டணாவுக்கு விற்கப்பட்ட ஒரு லட்டு, இன்று ரூ.50க்கு விற்கப்படுகிறது.
திருப்பதி லட்டு, வெறும் இனிப்புத் துண்டு அல்ல, அது ஸ்ரீவாரி அருளின் அடையாளம். மூன்று நூற்றாண்டுகளுக்கும் மேலாக, பக்தர்களின் பசியையும், ஆன்ம பசியையும் ஒருசேர நிறைவு செய்து வரும் இந்த மகா பிரசாதம், அதன் தனித்துவமான சுவையால் உலகப் புகழ்பெற்றது.
நிலவளம் ரெங்கராஜன்
