அமேசானின் ‘AI’ வெறி… உள்ளிருந்தே ஓங்கி ஒலிக்கும் அபயக் குரல்!

தொழில்நுட்ப உலகில் இப்போது நடப்பது சாதாரணப் போட்டியல்ல; அது ஒரு ‘AI ஆயுதப் போட்டி’ (AI Arms Race). ஒரு பக்கம் கூகுளின் ‘ஜெமினி’ (Gemini), மறுபக்கம் மைக்ரோசாஃப்ட்டின் ‘சாட்ஜிபிடி’ (ChatGPT) என ஜாம்பவான்கள் களத்தை ஆக்கிரமிக்க, “நாம் பின்தங்கி விடுவோமோ?” என்ற பதற்றத்தில் அமேசான் (Amazon) எடுத்துள்ள அதிரடி முடிவுகள், இப்போது அந்நிறுவனத்திற்குள்ளேயே ஒரு பூகம்பத்தைக் கிளப்பியுள்ளது.

போட்டியின் பின்னணி: ஜெமினி தந்த நெருக்கடி

கடந்த ஓராண்டாகவே செயற்கை நுண்ணறிவுத் துறையில் கூகுள் மற்றும் மைக்ரோசாஃப்ட் நிறுவனங்கள் அசுர வேகத்தில் முன்னேறி வருகின்றன. கூகுளின் ‘ஜெமினி’ (Gemini) மாடலும், ஓபன் ஏஐ (OpenAI)-யுடன் இணைந்த மைக்ரோசாஃப்ட்டின் ‘கோ-பைலட்’ (Copilot) தொழில்நுட்பமும் உலகையே திரும்பிப் பார்க்க வைத்தன.

இந்த போட்டியில் அமேசான் நிறுவனம் சற்று பின்தங்கியே இருந்தது. இ-காமர்ஸ் மற்றும் கிளவுட் கம்ப்யூட்டிங் (AWS) துறையில் ராஜாவாக இருந்தாலும், AI ஓட்டத்தில் தன்னை நிலைநிறுத்திக் கொள்ள வேண்டிய கட்டாயத்தில் அமேசான் உள்ளது. அதனால், போட்டியாளர்களை முந்திச் செல்ல வேண்டும் என்ற நோக்கில், ‘எந்த விலை கொடுத்தேனும்’ (All-costs-justified) என்ற அணுகுமுறையை நிர்வாகம் கையில் எடுத்தது. இதுதான் இப்போது வினையாகி இருக்கிறது.

வெடித்தது உள்நாட்டுப் போர்!

அமேசானின் இந்த “அவசர கதி” ஆபத்தானது என்று கூறி, அந்நிறுவனத்தின் 1,000-க்கும் மேற்பட்ட ஊழியர்கள் போர்க்கொடி தூக்கியுள்ளனர். இதில் மென்பொருள் பொறியாளர்கள், டேட்டா சயின்டிஸ்டுகள் மற்றும் நேரடியாக AI தொழில்நுட்பத்தை உருவாக்கும் வல்லுநர்களே கையெழுத்திட்டிருப்பதுதான் நிர்வாகத்திற்குப் பெரிய தலைவலி.

அவர்கள் வெளியிட்டுள்ள பகிரங்கக் கடிதத்தில் (Open Letter), கூகுள் மற்றும் மைக்ரோசாஃப்ட்டுடனான போட்டியைச் சமாளிக்க அமேசான் எடுக்கும் நடவடிக்கைகள் குறித்து மூன்று முக்கிய எச்சரிக்கைகளை விடுத்துள்ளனர்.

1. ஜனநாயகத்திற்கு ஆபத்து (Threat to Democracy) கூகுள் ஜெமினி போன்ற மாடல்கள் பாதுகாப்புக் கட்டுப்பாடுகளுடன் (Safety Guardrails) உருவாக்கப்படும்போது, அமேசான் அவசர கதியில் வெளியிடும் AI மாடல்கள் போதிய சோதனைகள் இன்றி சந்தைக்கு வரலாம். இது தவறான தகவல்களைப் (Misinformation) பரப்பி, தேர்தல் நேரங்களில் ஜனநாயகத்திற்கே அச்சுறுத்தலாக அமையும் என்று ஊழியர்கள் பயப்படுகிறார்கள்.

2. சுற்றுச்சூழலுக்கு வேட்டு (Climate Crisis) ஏற்கனவே கூகுள் மற்றும் மைக்ரோசாஃப்ட் நிறுவனங்களின் டேட்டா சென்டர்களால் கார்பன் வெளியீடு அதிகரித்துள்ளது. இப்போது அமேசானும் போட்டிக்காக பிரம்மாண்டமான புதிய டேட்டா சென்டர்களை அமைப்பது, பூமி வெப்பமடைதலை இன்னும் மோசமாக்கும். “பசுமை வாக்குறுதிகளைக் காற்றில் பறக்கவிட்டுவிட்டு, AI பந்தயத்தில் ஓடுவது சரியல்ல” என்பது ஊழியர்களின் வாதம்.

3. வேலைக்கு உலை (Job Security) “போட்டியாளர்களைச் சமாளிக்கிறோம்” என்ற பெயரில், மனித ஊழியர்களுக்குப் பதிலாக AI-யை அமர்த்துவது சொந்த நிறுவன ஊழியர்களின் வயிற்றிலேயே அடிக்கும் செயல் என்று அவர்கள் குமுறுகிறார்கள்.

ஊழியர்களின் குரல்

அந்தக் கடிதத்தில் அவர்கள் கூறியுள்ள வார்த்தைகள் மிகக் கூர்மையானவை:

“இந்த AI-யை உருவாக்குவதும், பயிற்றுவிப்பதும், இயக்குவதும் நாங்கள்தான் (ஊழியர்கள்). இது தவறான திசையில் செல்லும்போது, தடுத்து நிறுத்தும் பொறுப்பும் எங்களுக்கே உள்ளது. ஜனநாயகத்தையோ, பூமியையோ அழிக்கும் தொழில்நுட்ப வளர்ச்சி எங்களுக்குத் தேவையில்லை.”

ஆந்தையின் பார்வை

கூகுள் ஜெமினி மற்றும் மைக்ரோசாஃப்ட் உடனான போட்டி ஆரோக்கியமானதாக இருக்கலாமே தவிர, அது அறம் தவறியதாக இருக்கக்கூடாது. “அவன் வேகமாக ஓடுகிறான் என்று நாமும் கண்ணை மூடிக்கொண்டு ஓடினால், பள்ளத்தில்தான் விழுவோம்” என்பதை அமேசான் நிர்வாகம் உணர வேண்டும். தொழில்நுட்பம் மனிதனை வாழ வைக்க வேண்டுமே தவிர, வீழ்த்திவிடக் கூடாது.

அமேசான் நிர்வாகம் இந்தக் குரலுக்குச் செவிசாய்க்குமா? அல்லது “பிசினஸ் முக்கியம் பிகிலு” என்று போட்டியைக் தொடருமா? பொறுத்திருந்து பார்ப்போம்!