ஒரே பிராண்ட், இருவேறு தரம்: ஃபான்டாவில் தொடரும் பிராந்திய பாகுபாடு!

உலகளாவிய குளிர்பான நிறுவனங்கள் ஒரே பிராண்ட் பெயரில் வெவ்வேறு நாடுகளில் வெவ்வேறு தரத்திலான பானங்களை விற்பனை செய்வது குறித்து மீண்டும் விவாதம் எழுந்துள்ளது. லண்டனில் விற்கப்படும் ஃபான்டா கேன் ஒன்றில் 63 கலோரிகள் மட்டுமே உள்ளது. ஆனால் அதே பானம் இந்தியாவில் விற்கப்படும் போது, அதில் மூன்று மடங்கு கூடுதல் சர்க்கரை சேர்க்கப்படுகிறது. இது தவிர, ஐரோப்பிய நாடுகளில் சுகாதார எச்சரிக்கை விடுக்கப்பட வேண்டிய செயற்கை நிறமிகள் இந்தியாவில் எவ்வித பெரிய எச்சரிக்கையுமின்றி பாட்டிலின் பின்புறம் சிறிய எழுத்துக்களில் மட்டுமே குறிப்பிடப்படுகின்றன.

வெவ்வேறு நாடுகளுக்கு வெவ்வேறு சர்க்கரை அளவு

லண்டன் போன்ற ஐரோப்பிய நகரங்களில் சர்க்கரை பயன்பாட்டைக் குறைக்கக் கடுமையான வரி விதிப்புகளும் விதிகளும் நடைமுறையில் உள்ளன. இதன் காரணமாக, அங்குள்ள ஃபான்டா பானத்தில் சர்க்கரையின் அளவு பெருமளவு குறைக்கப்பட்டு, அதற்குப் பதிலாக செயற்கை இனிப்பூட்டிகள் குறைந்த அளவில் பயன்படுத்தப்படுகின்றன. இதனால் ஒரு கேனில் கலோரி அளவு வெறும் 63 ஆகக் கட்டுப்படுத்தப்பட்டுள்ளது.

ஆனால் இந்தியாவில் விற்கப்படும் அதே ஃபான்டாவில் சர்க்கரையின் அளவு மூன்று மடங்கு அதிகமாக உள்ளது. வளர்ந்து வரும் நாடுகளில் இனிப்புச் சுவைக்கு அதிக வரவேற்பு இருப்பதையும், இங்கு சர்க்கரை பயன்பாட்டிற்கு ஐரோப்பாவைப் போன்ற கடுமையான வரிகள் இல்லாததையும் சாதகமாகப் பயன்படுத்தி, அதிக சர்க்கரை சேர்க்கப்பட்ட பானங்களே சந்தைப்படுத்தப்படுகின்றன.

செயற்கை நிறமிகள் மற்றும் எச்சரிக்கை விதிகள்

பானத்திற்கு ஆரஞ்சு நிறத்தைத் தருவதற்காக சேர்க்கப்படும் செயற்கை சாயங்கள் (Artificial Dyes) விஷயத்திலும் இத்தகைய இரட்டை நிலைப்பாடு காணப்படுகிறது. ஐரோப்பிய ஒன்றியத்தின் உணவுப் பாதுகாப்பு விதிகளின்படி, குறிப்பிட்ட செயற்கை நிறமிகள் சேர்க்கப்படும் போது, அதனால் குழந்தைகளுக்கு கவனச்சிதறல் அல்லது பக்கவிளைவுகள் ஏற்படக்கூடும் என்ற எச்சரிக்கை வாசகம் தயாரிப்பின் முன் பக்கத்தில் தெளிவாகக் குறிப்பிடப்பட வேண்டும்.

இந்தியாவில் இத்தகைய செயற்கை நிறமிகள் பயன்படுத்தப்பட்டாலும், அது பற்றிய விபரம் கேன் அல்லது பாட்டிலின் பின்புறம் மிகச் சிறிய எழுத்துக்களில் மட்டுமே அச்சிடப்படுகிறது. இதனால் சாமானிய நுகர்வோர்கள் தாங்கள் அருந்தும் பானத்தில் உள்ள வேதிப்பொருட்களின் அபாயத்தை உணராமலேயே உட்கொள்ளும் சூழல் நிலவுகிறது.

நுகர்வோர் பாதுகாப்பு மற்றும் விழிப்புணர்வு

ஒரே உலகளாவிய பிராண்ட் தனது தயாரிப்பில் வெவ்வேறு நாடுகளுக்கு இடையே காட்டும் இந்தத் தர வேறுபாடு, பன்னாட்டு நிறுவனங்களின் வணிக உத்திகளையும், வளர்ந்து வரும் நாடுகளின் தளர்வான உணவுப் பாதுகாப்பு விதிகளையும் வெளிச்சம் போட்டுக் காட்டுகிறது. இந்திய நுகர்வோரின் ஆரோக்கியத்தைக் கருத்தில் கொண்டு, சர்க்கரை மற்றும் செயற்கை சாயங்களின் பயன்பாட்டில் கூடுதல் கட்டுப்பாடுகளைக் கொண்டுவர வேண்டியதன் அவசியத்தை இது உணர்த்துகிறது.

சங்கரன்