பிரின்ஸ் பிக்சர்ஸ் மற்றும் ஐ வி ஒய் என்டர்டெய்ன்மென்ட் நிறுவனங்கள் சார்பில் தயாரிப்பாளர்கள் எஸ். லக்ஷ்மன் குமார் மற்றும் இஷான் சக்சேனா தயாரிப்பில், இயக்குநர் பி. எஸ். மித்ரன் இயக்கத்தில் நடிகர் கார்த்தி நடித்துள்ள ‘சர்தார் 2’ திரைப்படத்தின் இசை மற்றும் முன்னோட்டம் வெளியீட்டு விழா சென்னையில் பிரமாண்டமாக நடைபெற்றது. சிறப்பு விருந்தினராகக் கலந்து கொண்ட நடிகர் சூர்யா, படத்தின் முன்னோட்டத்தை வெளியிட்டார். உளவுத்துறை அதிகாரிகளின் வாழ்வியல் பின்னணியை மையமாகக் கொண்டு உருவாகியுள்ள இந்த ஆக்சன் என்டர்டெய்னர் திரைப்படம், வரும் செப்டம்பர் 10 ஆம் தேதி முதல் உலகம் முழுவதும் திரையரங்குகளில் வெளியாகிறது.
சூர்யா வியந்த சர்வதேச தரம்
விழாவில் சிறப்பு விருந்தினராகப் பங்கேற்றுப் பேசிய நடிகர் சூர்யா, இப்படத்தின் டீசரைப் பார்த்தபோது நெட்ஃபிளிக்ஸில் ஏதோ ஒரு சர்வதேச திரைப்படத்தைப் பார்ப்பது போல் உணர்ந்தேன், திடீரென கார்த்தி உள்ளே வந்த பிறகே நம் தமிழ் படம் என்று புரிந்தது என வியந்து கூறினார். சர்தார் முதல் பாகத்தில் ஒரு முக்கிய விவாதத்தைக் கிளப்பிய மித்ரன், இந்த இரண்டாம் பாகத்தில் அதைவிடப் பெரிய விவாதத்தை உருவாக்குவார் என எதிர்பார்ப்பதாகத் தெரிவித்தார். மேலும், தயாரிப்பாளர் பட்ஜெட்டைப் பற்றி யோசிக்காமல் துணிச்சலாக இவ்வளவு பெரிய முதலீடு செய்து தம்பி கார்த்திக்கு பக்கபலமாக இருந்ததைப் பாராட்டினார்.
இயக்குநர் மித்ரன் பகிர்ந்த சுவாரசியங்கள்
இயக்குநர் பி. எஸ். மித்ரன் பேசுகையில், கார்த்தியுடன் பணியாற்றுவது ஒரு இயக்குநரின் பொறுப்புணர்வை மேம்படுத்தும் என்றார். எஸ். ஜே. சூர்யாவிடம் கதை சொல்லச் சென்றபோது, ஒரு இயக்குநராகச் செல்லாமல் எஸ். ஜே. சூர்யாவாகவே மாறி கதையைக் கூறியதாகத் தெரிவித்தார். மேலும், படத்திற்காக 17 நிமிடங்கள் வாட்ஸ்அப் ஆடியோ பேசி தனக்கு ஐடியாக்களை அனுப்பிய எஸ். ஜே. சூர்யாவின் அர்ப்பணிப்பையும், எந்தச் சூழலிலும் நோ பிரதர் டோன்ட் வொர்ரி என்று கூறி எனர்ஜி தரும் இசையமைப்பாளர் சாம் சி. எஸ். இன் பாசிட்டிவிட்டியையும் வெகுவாகப் பாராட்டினார்.
கார்த்தியின் சாரமான பேச்சு மற்றும் ரகசியங்கள்
நாயகன் கார்த்தி மேடையில் பேசுகையில், தமிழ் சினிமா பொழுதுபோக்கிற்கு மட்டுமல்ல, அது தமிழ்நாட்டின் அடையாளம் என்றார். எல்லாரும் 40, 50 மதிப்பெண் எடுக்க நினைக்கும் போது, இந்தப் படக்குழு 100 மதிப்பெண் எடுக்க வேண்டும் என உழைத்திருக்கிறது என்றார். படத்தைப் பற்றிக் கூறுகையில், பிளாஸ்டிக் பாட்டிலில் தண்ணீர் குடிப்பதைத் தவிர்க்க முடியாமல் நாம் தொடரலாம், ஆனால் இந்தப் படத்தைப் பார்த்த பிறகு இதில் சொல்லப்பட்டிருக்கும் உடல் ஆரோக்கியம் பற்றிய அதிர்ச்சிகரமான உண்மையை உங்களால் தவிர்க்கவே முடியாது எனச் சூசகமாகக் குறிப்பிட்டார்.
நகைச்சுவை நடிகர் யோகி பாபுவைக் குறிப்பிட்ட கார்த்தி, தான் அவரை முருகா என்றுதான் அழைப்பேன் என்றும், தயாரிப்பாளரும் இயக்குநரும் நன்றாக இருக்க வேண்டும் என நினைப்பதால் தான் அவருக்குத் தோல்வியே இல்லை என்றும் புகழாரம் சூட்டினார். மேலும், நெல்லையிலிருந்து கிடைத்த ஃப்ரெஷ்ஷான வில்லன் என்று எஸ். ஜே. சூர்யாவைக் குறிப்பிட்ட அவர், கேமரா முன்னால் 100 சதவீதம் நடிக்கும் அவர், மைக்கிற்கு முன்னால் 500 சதவீதம் எனர்ஜியைக் கொண்டு வந்துவிடுவார் என்றார்.
கதாநாயகிகளின் ஆக்சன் அனுபவங்கள்
நாயகி மாளவிகா மோகனன் பேசுகையில், படப்பிடிப்பின் முதல் நாளே 150 மீட்டர் உயரத்திலிருந்து குதித்து ஆக்சன் சண்டைக்காட்சியில் நடிக்க வேண்டியிருந்தது, பயந்தாலும் படக்குழுவின் ஆதரவால் நடித்தேன் என்றார். மற்றொரு நாயகி ஆஷிகா ரங்கநாத் பேசுகையில், ஜென் ஜீ தலைமுறை பெண்ணாக நடித்திருப்பதாகவும், கார்த்தி சர்தார் மற்றும் விஜி என இரட்டை வேடங்களில் நடித்ததால், தானும் ஒவ்வொரு காட்சியையும் இரண்டு முறை நடிக்க வேண்டியிருந்ததாகச் சுவாரசியமாகப் பகிர்ந்துகொண்டார்.
சாம் சி.எஸ்.ஸின் 100 ஆவது படம்: எஸ். ஜே. சூர்யாவின் நெகிழ்ச்சி
இசையமைப்பாளர் சாம் சி. எஸ். தனது 100 ஆவது திரைப்படத்தை எட்டியுள்ள நிலையில், அவருக்கு வாழ்த்துகள் குவிந்தன. நடிகர் எஸ். ஜே. சூர்யா பேசுகையில், வடபழனி ஸ்டுடியோவில் பாடச் சென்று 7 மணி நேரம் காக்க வைக்கப்பட்டு நிராகரிக்கப்பட்ட தன் நீண்ட காலப் பயணத்தையும் அவமானங்களையும் நினைவுகூர்ந்தார். சாம் சி. எஸ். இன் 100 ஆவது படத்தில் கார்த்தியுடன் இணைந்து தானும் நடித்திருப்பதே தனக்குக் கிடைத்த பெருமை என்றும், பின்னணி இசையமைப்பின் போது தானும் இயக்குநரும் அருகில் அமர்ந்து உருவாக்கியதால் இது மனதிற்கு மிக நெருக்கமான படம் என்றும் நெகிழ்ந்தார்.