காட்டின் காவலர்கள்:உலக யானைகளின் புதிரான உலகமும் மனிதகுலத்திற்கான எச்சரிக்கையும்!

ஆண்டுதோறும் ஆகஸ்ட் 12-ம் தேதி சர்வதேச யானைகள் தினம் உலகம் முழுவதும் விழிப்புணர்வுடன் கொண்டாடப்பட்டு வருகிறது. ஒரு காலத்தில் அடர்ந்த காடுகளில் எவ்வித அச்சமுமின்றிச் சுதந்திரமாக உலா வந்த இந்த பிரம்மாண்ட உயிரினங்களை, இன்று நாம் கோவில்களிலும் சர்க்கஸ் கூடாரங்களிலும் மட்டுமே பார்க்கும் அவலநிலை உருவாகியுள்ளது. தந்தத்திற்காக நடைபெறும் சட்டவிரோத வேட்டையாடுதல், காடழிப்பு மற்றும் மனித-யானை மோதல்கள் காரணமாக, நம் நாட்டின் செழிப்புக்கும் பாரம்பரியத்திற்கும் அடையாளமாகத் திகழும் இந்த இனம் அழிவின் விளிம்பை நோக்கித் தள்ளப்பட்டுள்ளது. நிலப்பரப்பில் வாழும் மிகப்பெரிய பாலூட்டியான யானைகளைப் பாதுகாக்கவும், சூழலியலில் அவற்றின் முக்கியத்துவத்தை மனிதகுலத்திற்கு உணர்த்தவும் இத்தினம் உலகளாவிய அளவில் கடைப்பிடிக்கப்படுகிறது.

2026-ம் ஆண்டிற்கான உலக யானைகள் தினத்தின் அதிகாரப்பூர்வ கருப்பொருள் (Theme) “Be More Like Elephants” (யானைகளைப் போல இருங்கள்) என்பதாகும். கடந்த 2025-ல் “Matriarchs & Memories” என்ற கருப்பொருளைத் தொடர்ந்து, இந்த ஆண்டு யானைகளிடம் காணப்படும் இரக்கம் (Empathy), ஆழமான சமூகப் பிணைப்பு, பரஸ்பர ஒத்துழைப்பு, கூர்மையான நினைவாற்றல், குடும்பப் பாதுகாப்பு, ஞானம் மற்றும் பொறுப்புணர்வு ஆகிய உயரிய பண்புகளை மனிதர்களும் தங்கள் வாழ்க்கையில் நடைமுறைப்படுத்த வேண்டும் என்பதை உலகளாவிய பிரச்சாரமாக இத்தீம் வலியுறுத்துகிறது.

உயிரியல் அமைப்பும் மூன்று முக்கியச் சிற்றினங்களும்

பூமியில் வாழும் நிலவாழ் உயிரினங்களிலேயே மிகப்பெரிய பாலூட்டியாக விளங்கும் யானைகளில் பிரதானமாக மூன்று சிற்றினங்கள் கண்டறியப்பட்டுள்ளன. அவை ஆப்பிரிக்கப் புதர்வெளி யானைகள் (African Bush Elephants), ஆப்பிரிக்கக் காட்டு யானைகள் (African Forest Elephants) மற்றும் ஆசிய யானைகள் (Asian Elephants) ஆகும். இவற்றின் உடலமைப்பிலும் வாழ்வியல் தன்மையிலும் பல சுவாரசியமான வேறுபாடுகள் உள்ளன:

தந்த அமைப்பு: ஆப்பிரிக்க யானைகளில் ஆண், பெண் இரண்டு பாலினங்களுக்கும் தந்தங்கள் உண்டு. ஆனால், ஆசிய யானைகளில் ஆண் யானைகளுக்கு மட்டுமே பெரிய தந்தங்கள் இருக்கும்; இந்தியாவில் உள்ள பெண் யானைகளுக்குத் தந்தங்கள் கிடையாது (சில ஆசிய நாடுகளில் அரிதாகப் பெண் யானைகளுக்குச் சிறிய தந்தங்கள் காணப்படுவதுண்டு).

உடலளவு மற்றும் வாழ்நாள்: வளர்ந்த ஆண் யானை பொதுவாக 3 மீட்டர் உயரமும், சுமார் 6,000 கிலோகிராம் எடையும் கொண்டிருக்கும். இதன் தோலின் தடிமன் மட்டுமே சுமார் 3 சென்டிமீட்டர் ஆகும். யானைகளின் சராசரி வாழ்நாள் 70 ஆண்டுகள் என்பதால், இவை ஏறக்குறைய மனிதர்களின் வாழ்நாளை ஒத்த உயிரினமாகத் திகழ்கின்றன.

தமிழ்ப் பெயர்கள்: தமிழ் இலக்கியத்திலும் வழக்கிலும் ஆண் யானையைக் ‘களிறு’ என்றும், பெண் யானையைப் ‘பிடி’ என்றும் சிறப்புப் பெயரிட்டு அழைக்கின்றனர். பெண் யானைகளின் கர்ப்ப காலம் சுமார் 2 ஆண்டுகள் (22 மாதங்கள்) ஆகும். பொதுவாக இவை நான்கு ஆண்டுகளுக்கு ஒருமுறை மட்டுமே குட்டி ஈனுகின்றன.

வியக்க வைக்கும் நினைவாற்றலும் குரல் வழியிலான அடையாளமும்

யானைகள் தங்களின் பிரம்மாண்டமான மூளையின் காரணமாக விலங்கினங்களிலேயே மிக உயர்ந்த நினைவாற்றலைக் கொண்டுள்ள நிலையில், பல ஆண்டுகளுக்கு முன் கடந்து வந்த நீர்நிலைகள், வறட்சி காலத்தில் உணவளித்த பாதைகள் மற்றும் தங்களுக்கு ஆபத்து விளைவித்த மனிதர்களைக் கூட அவை துல்லியமாக நினைவில் வைத்திருக்கும் வியத்தகு திறனைக் கொண்டுள்ளன. அத்துடன் நின்றுவிடாமல், மனிதர்களின் குரல் ஒலியை மட்டுமே வைத்துப் பேசுவது ஆணா, பெண்ணா அல்லது குழந்தையா என்பதைக் துல்லியமாக அடையாளம் காணும் ஆற்றல் பெற்றவை யானைகள்.

மட்டுமின்றி அக்குரலுக்குச் சொந்தக்காரர் தங்களுக்குப் பழக்கப்பட்ட அச்சுறுத்தலற்ற நபரா அல்லது வேட்டையாடும் ஆபத்து நிறைந்த பழங்குடியினத்தைச் சேர்ந்தவரா என்பதையும், அவர்களின் மொழி மற்றும் வயதைக் கொண்டு பாகுபடுத்திப் பகுப்பாய்வு செய்யும் அபார நுண்ணறிவையும் பெற்றுள்ளன. மேலும், காடுகளில் மைல்கள் கடந்து கேட்கும் அதி குறைந்த அதிர்வெண் கொண்ட அகச்சிவப்பு ஒலிகள் (Infrasonic Sounds) மற்றும் கால்களின் மூலம் பூமி அதிர்வுகளை உணரும் தந்திரமான அமைப்புகள் வழியாகத் தங்கள் கூட்டத்தின் பழைய நினைவுகளையும் எச்சரிக்கைகளையும் பரிமாறிக்கொள்ளுமாக்கும்

கூடவே இந்த மாபெரும் உயிரினங்கள், பல தசாப்தங்களுக்கு முன் தங்களுக்குத் தீங்கு விளைவித்த குறிப்பிட்ட நபர்களின் வாசனையையும் குரலையும் கூட நினைவில் வைத்துத் தற்காத்துக் கொள்ளும் அளவிற்கு ஒப்பிடமுடியாத டிஜிட்டல் நினைவகம் போன்ற ஒரு இயற்கையான மூளைக் கட்டமைப்பைக் கொண்டுள்ளன.

சமூகப் பிணைப்பும் கூட்டமைப்பின் ஆச்சரியங்களும்

யானைகள் பிற விலங்கினங்களைப் போலத் தங்களுக்குள் எல்லைக்காக்கும் தேவையற்ற மோதல்களிலோ அல்லது வன்முறையிலோ ஈடுபடாமல், பரஸ்பர நேசத்துடனும் அசைக்க முடியாத ஒற்றுமையுடனும் வாழக்கூடிய தனித்துவமான சமூக அமைப்பைக் கொண்டுள்ளன. ஒரு யானைக் கூட்டத்திற்கு அந்த அணியிலேயே மிகவும் மூத்த மற்றும் அனுபவம் வாய்ந்த வயதான பெண் யானையே (Matriarch) தலைமை தாங்கி வழிகாட்டுகிறது; இது காட்டின் நீர் ஆதாரங்கள், உணவுப் பாதைகள், ஆபத்தான பகுதிகள் மற்றும் காலநிலை மாற்றங்களைக் குறித்த பல தசாப்த கால அனுபவ அறிவைக் கொண்டு தன் கூட்டத்தில் உள்ள அனைத்து உறுப்பினர்களையும் பாதுகாப்பாக வழிநடத்துகிறது.

கூட்டத்தில் உள்ள ஏதேனும் ஒரு குட்டி யானைக்கு ஆபத்து என்றாலோ அல்லது பிற விலங்குகளால் அச்சுறுத்தல் ஏற்பட்டாலோ, அனைத்துப் பெண் யானைகளும் உடனடியாக ஒன்றுதிரண்டு அக்குட்டியை மையத்தில் வைத்துச் சுற்றிலும் அரண் போல நின்று தற்காத்துக் கொள்ளும் அற்புதமான பாதுகாப்புப் பிணைப்பை வெளிப்படுத்துகின்றன.

அதுமட்டுமன்றி, கூட்டத்தில் இருக்கும் ஒவ்வொரு தாய் யானையும் மற்ற தாய் யானைகளின் குட்டிகளுக்கும் தாயாக மாறி பாலூட்டி அரவணைப்பதோடு, காயமடைந்த அல்லது வயதான உறுப்பினர்களுக்கு உணவைப் பகிர்ந்தளித்து, வாழ்நாள் முழுவதும் பிறப்பு முதல் இறப்பு வரையிலான அனைத்து தருணங்களிலும் ஒரு குடும்பமாகவே இணைந்து செயல்படும் உயரிய சமூக முதிர்ச்சியை யானைகள் வெளிப்படுத்துகின்றன.

இறுதிச் சடங்கும் பராமரிப்பும்:

கூட்டத்தில் உள்ள ஒரு யானைக்கு உடம்பு சரியில்லை என்றாலோ அல்லது காயம் அடைந்திருந்தாலோ, மற்ற யானைகள் தொற்று அல்லது நோய் பாதிப்பைக் கண்டு விலகிச் செல்லாமல், அந்த யானையைச் சூழ்ந்து நின்று தங்களின் தும்பிக்கையால் மென்மையாகத் தொட்டு ஆறுதல் அளிப்பதுடன், உணவையும் நீரையும் தேடி வந்து ஊட்டி மிகுந்த கவனத்துடன் பராமரிக்கின்றன.

ஒருவேளை சிகிச்சை பலனின்றி அந்தக் கூட்டத்தைச் சேர்ந்த யானையோ அல்லது வேறு கூட்டத்தைச் சேர்ந்த யானையோ இறந்துவிட்டால், அதை அப்படியே கடந்து செல்லாமல் சுற்றிலும் உள்ள யானைகள் அனைத்தும் ஒன்றுகூடி ஆழ்ந்த அமைதியுடன் துக்கம் அனுசரிக்கின்றன. இறந்த யானையின் உடலைத் தும்பிக்கையால் தவிப்புடன் தொட்டுப்பார்த்து, குரல் எழுப்பி அஞ்சலி செலுத்திய பிறகு, காட்டில் கிடைக்கும் மரக்கிளைகள், காய்ந்த இலைகள் மற்றும் மண்ணை அள்ளி வந்து உடலின் மீது தூவி ஒரு மனிதனைப் போலவே ‘அடக்கம் செய்யும்’ அதிசயமான வழக்கத்தை யானைகள் கொண்டுள்ளன.

அதுமட்டுமன்றி, பல ஆண்டுகள் கழித்து அந்த இடத்தைக் கடந்து செல்லும்போதும், அங்குள்ள எலும்புகளைத் தும்பிக்கையால் தடவிப் பார்த்துத் தங்களின் பழைய நினைவுகளையும் சோகத்தையும் புதுப்பித்துக் கொள்ளும் அளவிற்கு மனிதர்களுக்கு இணையான ஆழ்ந்த உணர்ச்சிப்பூர்வமான பிணைப்பையும் இரக்க குணத்தையும் யானைகள் வெளிப்படுத்துகின்றன.

உறக்கமும் சுறுசுறுப்பும்:

பிரம்மாண்ட உடலமைப்பைக் கொண்டிருந்தாலும், யானைகள் ஒரு நாளைக்குச் சராசரியாக 2 முதல் 3 மணி நேரம் மட்டுமே உறங்கி, விலங்கினங்களிலேயே மிகக் குறைந்த நேரம் தூங்கும் உயிரினங்களில் ஒன்றாக வியக்க வைக்கின்றன. தங்களின் பிரம்மாண்ட உடலுக்குத் தேவையான பெருமளவிலான உணவை உட்கொள்ள வேண்டிய கட்டாயம் இருப்பதால், எஞ்சிய 21 மணி நேரத்திற்கும் மேலாக அவை காடுகளில் சுறுசுறுப்பாக உலாவி உணவு தேடுவதிலும், சூழலியலைக் காக்கும் பணிகளிலுமே தங்களை ஈடுபடுத்திக் கொள்கின்றன.

யானைகள் நின்றுகொண்டே குட்டித் தூக்கம் போடும் திறன் பெற்றிருந்தாலும், 3 அல்லது 4 நாட்களுக்கு ஒருமுறை மட்டுமே தரையில் படுத்து ஆழ்ந்த உறக்கத்தை (REM Sleep) மேற்கொள்கின்றன. இவ்வாறு விழிப்புடன் இருக்கும் பெரும்பாலான நேரங்களில் அவை காடுகளின் வழியே மைல் கணக்கில் நடைபயணம் மேற்கொண்டு, அடர்ந்த பாதைகளை உருவாக்கிப் பிற விலங்குகளுக்கு வழிவகுத்தல், வறட்சி காலத்தில் நிலத்தைத் தோண்டி நீர்நிலைகளை உருவாக்குதல் மற்றும் கழிவுகள் மூலம் விதைகளைப் பரப்புதல் போன்ற இயற்கையின் மகத்தான ‘பொறியாளர்’ பணிகளைத் தடையின்றிச் செய்து வருகின்றன.

உடற்கூறியல் விசித்திரங்களும் அறியப்படாத உண்மைகளும்

யானைகளின் உடலமைப்பில் பல அரிய மற்றும் ஆச்சரியமான அம்சங்கள் நிறைந்துள்ளன:

தும்பிக்கை சக்தி: யானையின் தும்பிக்கை எலும்புகள் ஏதுமின்றி சுமார் 40,000 தசைகளால் ஆனது. இதனால் மிகச்சிறிய விதையை எடுப்பது முதல் பெரிய மரக்கிளைகளை முறிப்பது வரை நுட்பமாகச் செய்ய முடியும்.

தந்தத்தின் சமச்சீரற்ற தன்மை: மனிதர்களில் வலது கை அல்லது இடது கை பழக்கம் இருப்பது போல, யானைகளுக்கும் ஏதேனும் ஒரு தந்தத்தைப் அதிகமாகப் பயன்படுத்தும் பழக்கம் உண்டு. இதனால் அவற்றின் இரண்டு தந்தங்களும் ஒரே அளவில் இருக்காது; அதிகமாகப் பயன்படுத்தப்படும் தந்தம் சற்று தேய்மானத்துடன் காணப்படும்.

பற்களின் எடை: யானையின் ஒரு வாய் பல்லின் எடை மட்டுமே சுமார் 5 கிலோகிராம் வரை இருக்கும். வாழ்நாளில் இவை பலமுறை புதிய பற்களைப் பெறுகின்றன.

பிறவிப் பார்வையின்மை: யானைக் குட்டிகள் பிறக்கும் போது முழுமையான பார்வையற்ற நிலையிலேயே பிறக்கின்றன. காலப்போக்கில்தான் அவற்றின் பார்வைத் திறன் படிப்படியாக வளர்ச்சியடைகிறது.

குதிக்கும் திறனின்மை: தன் உடலின் அதிக எடையின் காரணமாகத் துள்ளி குதிக்க முடியாத ஒரே பாலூட்டி யானை மட்டுமே ஆகும்.

எதிரிகளும் மனித பயமும்: அளவில் பெரியதாக இருந்தாலும், சிறிய எறும்புகள் மற்றும் தேனீக்களின் ரீங்காரத்தைக் கண்டு யானைகள் மிகுந்த அச்சமடைகின்றன. இவை யானையின் தும்பிக்கைக்குள் நுழையும் போது கடுமையான அசௌகரியத்தை ஏற்படுத்துவதே இதற்குக் காரணம்.

வண்ண விருப்பமின்மை: யானைகளுக்குப் பொதுவாகச் சிவப்பு நிறம் பிடிப்பதில்லை; சிவப்பு நிறத்தைக் கண்டால் அவை அச்சுறுத்தலாக உணர்கின்றன.

மனித பயன்பாடும் இயற்கை பாதுகாப்புச் சவால்களும்

பண்டைய காலம் முதல் மனிதர்கள் யானைகளைச் சரக்குகள் மற்றும் பெரிய பெட்டிகளை இழுத்துச் செல்லப் பயன்படுத்தி வந்தனர். இந்தோனேஷியாவில் காட்டுத் தீ பரவாமல் தடுக்கத் தீயணைப்புத் துறையில் பயிற்சி அளிக்கப்பட்ட யானைகள் இன்றும் பயன்படுகின்றன. நீர்நிலைகளைக் கண்டால் சிறிய குழந்தைகளைப் போல விளையாடி மகிழும் இயல்புடையவை.ஆனாலும், யானைகளின் தந்தங்கள் சர்வதேசச் சந்தையில் அதிக விலைக்குக் போவதால், சமூக விரோதிகளால் இவை பெருமளவில் வேட்டையாடப்படுகின்றன. தவிர, காடழிப்பு, தொடர்வண்டிப் பாதைகள் மற்றும் மின்சார வேலி அமைப்புகளால் ஏற்படும் உயிரிழப்புகள் ஆகியவை யானை இனத்தின் இருப்பை அச்சுறுத்துகின்றன. காடுகளின் மறுஉருவாக்கத்திற்கும், தாவரங்களின் பரவலுக்கும், நீர் ஆதாரங்களை உருவாக்குவதற்கும் யானைகள் ‘காட்டின் பொறியாளர்கள்’ (Ecosystem Engineers) ஆகச் செயல்படுகின்றன.

மொத்ததில் மனிதர்களைப் போலவே மன அழுத்தம் (Post-traumatic stress) போன்ற உளவியல் பாதிப்புகளுக்கு ஆளாகும் இந்த அதிசய உயிரினத்தை அழிவிலிருந்து காப்பது பூமியின் சமநிலையைப் பேணுவதற்கு மிகவும் அவசியமாகும். “Be More Like Elephants” என்ற கூற்றுக்கிணங்க, யானைகளின் சமூகப் பண்புகளையும் ஒற்றுமையையும் போற்றி, இந்த மாபெரும் விலங்கினத்தைக் காக்க உறுதி ஏற்பதே இந்நாளின் உண்மையான நோக்கமாகும்.

நிலவளம் ரெங்கராஜன்