இந்தியாவின் மென்பொருள் சேவை (SaaS) துறையில் தற்போது ஒரு மிகப்பெரிய மாற்றுக் கலாச்சாரம் உருவாகி வருகிறது. குறிப்பாக, தலைமைத் தொழில்நுட்ப அதிகாரிகள் (CTO) நியமனத்தில் பாரம்பரிய முறைகளைத் தவிர்த்து, புதிய அணுகுமுறையை ஸ்டார்ட்அப் நிறுவனங்கள் கையாளத் தொடங்கியுள்ளன. இது குறித்த சுவாரசியமான தகவல்களை ‘லாங்ஹவுஸ்’ (Longhouse) என்ற நிர்வாகத் தேடல் நிறுவனம் வெளியிட்டுள்ள ஆய்வு முடிவுகள் விளக்குகின்றன.
துறை சாராத வல்லுநர்களுக்கு மகுடம்
பொதுவாக ஒரு குறிப்பிட்ட துறையில் உள்ள நிறுவனங்கள், அதே துறையில் அனுபவம் வாய்ந்தவர்களையே உயர்பதவிகளுக்குத் தேர்ந்தெடுக்கும். ஆனால், இந்திய சாஸ் நிறுவனங்களில் தற்போது 60 சதவீத CTO-க்கள் அந்தத் துறை சாராத பின்னணியில் இருந்து வந்தவர்கள் என்பது வியப்பிற்குரிய தகவல். பெரும்பாலும் ‘என்டர்பிரைஸ் டெக்னாலஜி’ (Enterprise Technology) எனப்படும் பெருநிறுவனத் தொழில்நுட்பத் துறையில் இருந்து வருபவர்களுக்கே தற்போது அதிக முன்னுரிமை அளிக்கப்படுகிறது.
வளர்ச்சி நிலைக்கு ஏற்ப மாறுபடும் தேடல்
நிறுவனங்கள் தங்களது வளர்ச்சி நிலைக்கு ஏற்ப (Early stage vs Late stage) தகுதிகளை மாற்றிக்கொள்கின்றன:
-
ஆரம்பக்கட்ட நிறுவனங்கள்: பல்வேறு கல்வி மற்றும் தொழில்முறைப் பின்னணி கொண்டவர்களைத் தொழில்நுட்பத் தலைவர்களாக ஏற்கின்றன.
-
வளர்ச்சியடைந்த நிறுவனங்கள்: ஆழமான கணினி அறிவியல் அறிவு மற்றும் சிக்கலான தொழில்நுட்பக் கட்டமைப்புகளை (Complex Systems) வெற்றிகரமாகக் கையாண்ட அனுபவம் உள்ளவர்களையே நாடுகின்றன.
“இன்றைய சூழலில் ஒரு CTO என்பவர் வெறும் தயாரிப்பை உருவாக்குபவர் மட்டுமல்ல; அவர் ஒரு நிறுவனத்தின் வளர்ச்சியைத் திட்டமிடும் முதன்மைச் சிற்பி (Architect of Scale)” என்கிறார் லாங்ஹவுஸ் நிறுவனத்தின் சிஇஓ அன்ஷுமான் தாஸ்.
புதிய தலைமுறை தொழில்நுட்பத் தலைவர்கள்
இந்த ஆய்வில் வெளிவந்துள்ள மற்றுமொரு முக்கியத் தகவல், தற்போதுள்ள 55 சதவீத CTO-க்கள் அந்தந்த நிறுவனங்களின் நிறுவனர்களாகவோ அல்லது இணை நிறுவனர்களாகவோ உள்ளனர். நிறுவனர்களாக இல்லாத 90 சதவீத CTO-க்கள், வெறும் தொழில்நுட்பம் மட்டுமன்றி, தயாரிப்பு உத்தி மற்றும் வாடிக்கையாளர் மேலாண்மை எனப் பன்முகத் திறமை கொண்டவர்களாக உள்ளனர். மேலும், இவர்களில் மூவரில் ஒருவரிடம் காப்புரிமை (Patents) இருப்பது, புதுமைக்கும் உலகளாவிய தரத்திற்கும் கொடுக்கப்படும் முக்கியத்துவத்தைக் காட்டுகிறது.
மாறிவரும் தகுதிகள்
வெறுமனே ஒரு மென்பொருளை உருவாக்குவதோடு நில்லாமல், அதை உலகளாவிய அளவில் விரிவுபடுத்துவதும், வணிக இலக்குகளுக்கு ஏற்பத் தொழில்நுட்பத்தை வடிவமைப்பதுமே இன்றைய CTO-க்களின் சவாலாக உள்ளது. எனவே, அனுபவத்தை விடவும் சூழ்நிலைக்கு ஏற்ப மாறும் தன்மை (Adaptability) மற்றும் வணிகப் புரிதல் (Business Alignment) ஆகியவற்றையே நிறுவனங்கள் தற்போது முக்கியத் தகுதியாகப் பார்க்கின்றன.
ஈஸ்வர் பிரசாத்