மனிதகுலத்தின் ஆரோக்கியம் நாம் வாழும் நிலம், காற்று, நீர் மற்றும் சூழலியல் தூய்மையோடு நேரடியாகப் பிணைக்கப்பட்டுள்ளதை உணர்த்தும் வகையில் ஒவ்வொரு ஆண்டும் செப்டம்பர் 26 ஆம் நாள் உலக சுற்றுச்சூழல் சுகாதார நாளாக அனுசரிக்கப்படுகிறது. அறிவியல் ரீதியான ஆதாரங்கள் மற்றும் தரவுகளின் அடிப்படையில் மாசுபாட்டைக் குறைத்து பொது சுகாதாரத்தைப் பாதுகாக்கவும், எதிர்காலச் சந்ததியினருக்குப் பாதுகாப்பான சூழலை உருவாக்கவும் அனைவரும் ஒருங்கிணைந்து செயல்பட வேண்டும் என்பதை இந்த சிறப்பு நாள் உலகிற்கு வலிமையாக வலியுறுத்துகிறது. சர்வதேச சுற்றுச்சூழல் சுகாதாரக் கூட்டமைப்பான ஐ.எப்.இ.எச் (IFEH) அமைப்பால் இந்த நாள் முன்னெடுக்கப்படுகிறது. இந்த ஆண்டின் அதிகாரப்பூர்வ கருப்பொருளாக ‘சுற்றுச்சூழல் சுகாதாரம்: சமூகங்களைப் பாதுகாக்க அறிவியலுடன் நிற்போம்’ (Environmental Health: Standing with Science to Protect Communities) என்ற முழக்கம் அறிவிக்கப்பட்டுள்ளது. சுற்றுச்சூழல் அபாயங்களை அறிவியல் ஆதாரத்தின் அடிப்படையில் கண்டறிந்து, பொது சுகாதார முடிவுகளை எடுத்து, சமூகங்களைப் பாதுகாப்பதே இதன் முக்கிய செய்தியாகும்.
அறிவியல் பார்வையும் சுற்றுச்சூழல் அபாயங்களும்
நவீன நாகரிகத்தின் துரித வளர்ச்சி மற்றும் தொழில்மயமாக்கல் காரணமாக பூமியின் இயற்கையான சமநிலை கடுமையாகப் பாதிக்கப்பட்டுள்ளது. காற்று மாசுபாடு, நச்சு கலந்த குடிநீர், ஆபத்தான இரசாயனக் கழிவுகள் மற்றும் தீவிரமான பருவநிலை மாற்றங்கள் ஆகியவை மனித குலத்தின் உடல் மற்றும் மன நல்வாழ்வுக்கு நேரடி அச்சுறுத்தலாக மாறிவிட்டன. உணர்ச்சிவசப்பட்ட விவாதங்களைத் தாண்டி, உண்மையான தரவுகளையும் அறிவியல் சான்றுகளையும் அடிப்படையாகக் கொண்டு இந்தச் சிக்கல்களை அணுக வேண்டிய தருணத்தில் நாம் இருக்கிறோம். காற்று மற்றும் நீரில் கலக்கும் கண்ணுக்குத் தெரியாத நச்சுத் துகள்கள் மனிதனின் சுவாச மண்டலம் மற்றும் நரம்பு மண்டலத்தை எவ்வாறு சிதைக்கின்றன என்பதை மருத்துவ அறிவியலும் சுற்றுச்சூழல் ஆய்வுகளும் தொடர்ச்சியாக எச்சரித்து வருகின்றன.
சுத்தமான வளங்களும் சமூகப் பாதுகாப்பும்
அனைவருக்கும் சுத்தமான குடிநீர், நச்சுத்தன்மையற்ற காற்று மற்றும் பாதுகாப்பான உணவு ஆகியவை அடிப்படை மனித உரிமையாகும். ஆனால், மாறிவரும் சூழலியல் சீர்கேடுகளால் இந்த அடிப்படையான தேவைகள்கூட கேள்விக்குறியாகி வருகின்றன. அறிவியல் சார்ந்த தரவுகளின் உதவியுடன் கழிவு மேலாண்மை முறைகளை நவீனப்படுத்துவதும், நச்சுப் புகையைக் கட்டுப்படுத்துவதும் அவசியமான கடமையாகும். குறிப்பாக கிராமப்புறங்கள் முதல் பெருநகரங்கள் வரை வாழும் விளிம்புநிலைச் சமூகம் மற்றும் எளிய மக்கள் தான் இந்தச் சுற்றுச்சூழல் மாசுபாட்டின் நேரடித் தாக்கத்திற்கு ஆளாகிறார்கள். அவர்களைப் பாதுகாப்பதற்கான கொள்கை முடிவுகளை அறிவியலின் துணையோடு அரசாங்களும் சமூக அமைப்புகளும் உடனடியாக எடுக்க வேண்டும்.
எதிர்காலச் சந்ததிக்கான அறிவியல் சார்ந்த அறைகூவல்
இந்த ஆண்டின் கருப்பொருள் உணர்த்துவது போல, எதிர்காலச் சந்ததியினர் ஆரோக்கியமான பூமி மற்றும் தூய்மையான காற்றில் சுவாசித்து வாழ வேண்டும் என்றால், இன்றே நாம் அறிவியல் வழியிலான துணிச்சலான நடவடிக்கைகளை எடுக்க வேண்டும். தற்காலிக லாபங்களுக்காக இயற்கையைச் சூறையாடும் போக்குக்கு முற்றுப்புள்ளி வைத்துவிட்டு, சூழலியல் பாதுகாப்பை நமது முதல் கடமையாக மாற்ற வேண்டும். அறிவியல் கண்டுபிடிப்புகளையும் பொது சுகாதாரக் கட்டமைப்புகளையும் இணைத்துச் செயல்படுவதன் மூலமே ஒரு நிலையான மற்றும் பாதுகாப்பான உலகத்தை நாம் உருவாக்க முடியும்.
நிலவளம் ரெங்கராஜன்