தண்ணீர் மத்தன் தினங்கள், பிரேமலு போன்ற வெற்றிப் படங்களை வழங்கிய இயக்குநர் கிரீஷ் ஏ.டி., மீண்டும் ஒரு உணர்வுப்பூர்வமான, கலகலப்பான படைப்போடு வந்திருக்கிறார். நாயகன் – நாயகியின் காதல் கதையே முழு படமாக விரிந்தாலும், ஏகப்பட்ட துணை கதாபாத்திரங்கள், அவர்களின் இயல்பு, அவர்களின் பயணம் என சகல வித சூழலிலும் இயல்பாக பயணிக்கிறது படம். குறிப்பாக சங்கீத் பிரதாப்பின் கதாபாத்திர வடிவமைப்பு, அவரின் காதல் கதை, அதற்கான க்ளைமாக்ஸ் போன்றவை நிறைவான அத்தியாயங்களாக நீள்கின்றன.
கதைக்களம் மற்றும் திரைக்கதை
அமைதியான கிராமத்து வாழ்க்கையிலிருந்து புதிய நகர்ப்புற அடுக்குமாடி குடியிருப்புப் பகுதிக்குத் தன் குடும்பத்தோடு குடிவருகிறார் இளம் பெண் ஆஷ்லி. அந்தப் பகுதியில் வசிக்கும், வாழ்க்கையைத் தன் போக்கில் ஜாலியாக வாழும் நடுத்தர வயது நபரான ஜஸ்டினுடன் அவருக்குப் பழக்கம் ஏற்படுகிறது. வயது இடைவெளி இருந்தபோதிலும், இருவருக்கும் பொதுவான இசை ரசனை, பழைய கேசட்டுகள் மற்றும் பேச்சுவார்த்தைகள் வழியாக ஒரு மெல்லிய பிணைப்பு உருவாகிறது.
ஆஷ்லிக்கு ஜஸ்டின் மீது காதல் மலர, வயது வித்தியாசம் மற்றும் சமூகத்தின் கேள்விகளைக் கருத்தில் கொண்டு ஜஸ்டின் தயங்குகிறார். இந்த உணர்வுப் போராட்டத்தையும், இருவருக்கும் இடையே வளரும் உறவையும் நாகரிகமாகவும், நகைச்சுவை ததும்பவும் சொல்லியிருக்கிறது திரைக்கதை.
கதாபாத்திரங்களும் நடிப்பும்
சிறிய மற்றும் எளிமையான தருணங்கள் வழியாகக் காதலை மிக அழகாகக் கட்டமைக்கும் ‘பெத்லகேம் குடும்ப யூனிட்’ திரைப்படத்தில், கதாபாத்திரங்கள் தங்களின் காதலை வெளிப்படுத்தும் அந்த இடைவேளைக் காட்சி, சமீபத்திய மலையாள சினிமாவில் வெளியான மிக அழகான தருணங்களில் ஒன்றாக மாறுகிறது; இது ஏதோ ஒரு மிகப்பெரிய புரட்சிகரமான சம்பவமாக வெளிப்படையாகக் காட்டப்படாவிட்டாலும், காதலே இயல்பாகப் புரட்சிகரமானது என்பதால் இந்தத் தருணமும் புரட்சிகரமாகவே உருவெடுக்கிறது, அதேவேளையில் படத்தில் வரும் மனிதர்களையும் அவர்களின் சூழலையும் முழுமையாகப் பூரணமானவர்களாகக் காட்டாமல், குடும்பத்தினர் வழியே ஜஸ்டின் எதிர்கொள்ளும் தேவையற்ற திருமண நெருக்கடி, ஜஸ்டினுடனான உறவைத் துண்டிக்க ஆஷ்லியை அவளது தாய் உணர்வு ரீதியாக மிரட்டித் திசைதிருப்புவது, மற்றும் ஆஷ்லியின் தந்தையைத் திறமையற்றவராகக் கருதி குடும்பத்தின் தலைவன் போல நடந்துகொள்ளும் தாய்மாமன் அலெக்ஸின் தலையீடு எனச் சமூகத்தின் பல்வேறு நிஜ மனிதர்களின் குணங்களையும் அவர்தம் சூழலையும் படம் மிக நுட்பமாகப் பதிவு செய்துள்ளது.
நீண்ட இடைவெளிக்குப் பிறகு நிவின் பாலி தனது பழைய ‘பிரேமம்’ மற்றும் ‘தட்டத்தின் மறயத்து’ பாணி இயல்பான நடிப்பால் கவர்கிறார். குழப்பம், தயக்கம், அனிச்சையான நகைச்சுவை என ஜஸ்டின் கதாபாத்திரத்திற்கு மிகக் கச்சிதமாகப் பொருந்துகிறார்.
மமிதா பைஜூ துடிதுடிப்பான நடிப்பாலும், அழுத்தமான எக்ஸ்பிரஷன்களாலும் படத்தைத் தாங்கிப் பிடிக்கிறார். இளமைத் துள்ளலும், காதலை வெளிப்படுத்தும் விதம் எனத் தன் முந்தைய படங்களை விட இதில் கூடுதல் முதிர்ச்சியைக் காட்டியுள்ளார்.
நாயகனின் தம்பியாக நடித்திருக்கும் சங்கீத் பிரதாப், பிந்து பணிக்கர், சுரேஷ் கிருஷ்ணா, வினய் ஃபோர்ட், ஸ்ரிந்தா, ஷமீர் கான், மீனாட்சி ரவீந்திரன், அயசங்கர் கரிமுட்டம், தங்கம் மோகன், வெட்டுக்கிளி பிரகாஷ் என அனைத்து நடிகர்களும் கதாபாத்திரங்களுக்கு பொருத்தமான தேர்வாக இருப்பதோடு, தங்களது திரையிருப்பு மூலம் திரைக்கதைக்கு பெரும் பலம் சேர்த்திருக்கிறார்கள்.
தொழில்நுட்பக் குழுவின் பங்களிப்பு
விஷ்ணு விஜயின் இசை இப்படத்திற்கு மிகப்பெரிய பலம். பாடல்கள் கதையோடு ஒன்றிப் போவதோடு, பின்னணி இசை ஒவ்வொரு உணர்வுப்பூர்வமான காட்சிக்கும் உயிர் கொடுக்கிறது.
ஒளிப்பதிவு நகர்ப்புற குடியிருப்புப் பகுதியின் வண்ணங்களையும், கதாபாத்திரங்களின் நெருக்கத்தையும் இயல்பாகப் படம்பிடித்துக் காட்டுகிறது. எடிட்டிங் படத்தின் முதல் பாதியைச் சுவாரஸ்யமாகக் கொண்டு சென்றாலும், இரண்டாம் பாதியில் சில நிமிடங்களைச் சுருக்கியிருக்கலாம் என்ற எண்ணத்தை ஏற்படுத்துகிறது.
மொத்தத்தில் இரண்டாம் பாதியில் மெதுவாக நகரும் சில காட்சிகள் மற்றும் எளிதில் ஊகிக்கக்கூடிய க்ளைமாக்ஸ் ஆகியவை சிறிய குறைகளாகத் தெரிந்தாலும், குடும்பத்தோடும் நண்பர்களோடும் அமர்ந்து மனதாரச் சிரித்து மகிழக்கூடிய ஒரு அருமையான ஃபீல்-குட் ரொமான்டிக் காமடின்னாக ‘பெத்லகேம் குடும்ப யூனிட்’ மிளிர்கிறது.
ரேட்டிங்: 3.5/5