‘போர் தொழில்’, ‘ப்ளூ ஸ்டார்’ படங்களின் வெற்றியைத் தொடர்ந்து நடிகர் அசோக் செல்வன் கதையின் நாயகனாக நடிக்கும் புதிய திரைப்படத்திற்கு ‘அன்பில் அவன்’ எனப் பெயரிடப்பட்டுள்ளது. இப்படத்தின் ஃபர்ஸ்ட் லுக் மற்றும் டைட்டில் டீசர் சென்னையில் நடைபெற்ற பிரம்மாண்ட விழாவில் வெளியிடப்பட்டது.
‘போர் தொழில்’ திரைப்படத்தின் இயக்குநர் விக்னேஷ் ராஜா கதையமைக்க, ஆர். கார்த்திகேயன் இத்திரைப்படத்தை இயக்கியுள்ளார். ஐங்கரன் இன்டர்நேஷனல் மற்றும் ஹேப்பி ஹை பிக்சர்ஸ் நிறுவனங்கள் சார்பில் கே. கருணாமூர்த்தி, அசோக் செல்வன் மற்றும் அபிநயா செல்வம் ஆகியோர் இணைந்து தயாரித்துள்ள இத்திரைப்படம் வரும் செப்டம்பர் மாதம் திரைக்கு வரவுள்ளது.
படத்தின் நட்சத்திரக் கூட்டணி மற்றும் தொழில்நுட்பக் குழு:
இப்படத்தில் அசோக் செல்வனுக்கு ஜோடியாக பிரீத்தி முகுந்தன் நடிக்கிறார். மேலும் சபு மோன், அப்துல் சமத், கதிர் பாலு, மஹா டெல்லி கணேஷ் உள்ளிட்ட பல முக்கிய நடிகர்கள் இணைந்து நடித்துள்ளனர். ’96’ படப்புகழ் கோவிந்த் வசந்தா இசையமைக்க, கௌதம் ராஜேந்திரன் ஒளிப்பதிவையும், ஆர்.கே. செல்வா படத்தொகுப்பையும் மேற்கொண்டுள்ளனர். மணிகண்டன் ஸ்ரீனிவாசன் கலை இயக்குநராகப் பணியாற்றியுள்ளார்.
தயாரிப்பாளர் அபிநயா செல்வம் நெகிழ்ச்சி:
நிகழ்ச்சியில் பேசிய தயாரிப்பாளர் அபிநயா செல்வம், ” ‘ஓ மை கடவுளே’ திரைப்படத்திற்குப் பிறகு எங்கள் தயாரிப்பில் உருவாகும் இரண்டாவது படம் இது. இயக்குநர் விக்னேஷ் ராஜா கதையைக் கூறியவுடனேயே எங்கள் அனைவருக்கும் மிகவும் பிடித்துவிட்டது. ‘போர் தொழில்’, ‘ப்ளூ ஸ்டார்’ வெற்றிக்குப் பிறகு ஏராளமான வாய்ப்புகள் வந்தபோதும், அசோக் செல்வன் அவற்றை ஒதுக்கிவைத்துவிட்டு இப்படத்திற்காக முழு அர்ப்பணிப்புடன் உழைத்துள்ளார்” என்றார்.
பெண்களின் கனவுகளைப் பேசும் கதை – இயக்குநர் பெருமிதம்:
இயக்குநர் ஆர். கார்த்திகேயன் பேசுகையில், ” ‘அன்பில் அவன்’ என்பது கனவுகளைப் பற்றிப் பேசும் ஒரு திரைப்படம். குறிப்பாக பெண்களின் கனவுகள், அதை அடைவதற்கான அவர்களின் தேடல், போராட்டம் மற்றும் சவால்களைக் காதலுடன் உணர்வுபூர்வமாகச் சொல்கிறது. இந்தப் படத்தைப் பார்த்துவிட்டு வெளியே வரும் ஒவ்வொரு பெண்ணும், தனக்கான வாழ்க்கைத்துணை இப்படித்தான் இருக்க வேண்டும் என்று விரும்புவார்கள்” என்று தெரிவித்தார்.
கதாநாயகி பிரீத்தி முகுந்தன் மகிழ்ச்சி:
கதாநாயகி பிரீத்தி முகுந்தன் பேசுகையில், “இது என் இதயத்திற்கு மிகவும் நெருக்கமான ஒரு படைப்பு. இந்த வாய்ப்பை அளித்த தயாரிப்பாளருக்கும் இயக்குநருக்கும் நன்றி. திருமணமான, திருமணமாகாத அனைத்து பெண்களுக்கும் இந்தப் படம் நிச்சயம் பிடிக்கும். சக நடிகைக்கு அதிக முக்கியத்துவமும் திரை பங்களிப்பும் அளித்து ஊக்குவித்த அசோக் செல்வனுக்கு என் நன்றிகள்” என்றார்.
அசோக் செல்வன் பகிர்ந்த சுவாரஸ்ய தகவல்கள்:
விழாவில் பேசிய நடிகர் அசோக் செல்வன், “என் நடிப்பில் படம் வெளியாகி இரண்டரை வருடங்கள் ஆகிவிட்டன. தற்போதைய சூழலில் வெறும் கதையை விட, அதைத் திரையில் சொல்லும் ஸ்டைல் மற்றும் திரையரங்க அனுபவம்தான் முக்கியம். ‘அன்பில் அவன்’ திரைப்படத்தில் ரசிகர்கள் மற்றும் குறிப்பாகப் பெண்கள் ரசிக்கக்கூடிய எண்ணற்ற தருணங்கள் உள்ளன.
காதல் என்பது ஒரு புத்திசாலியை முட்டாளாக்கும்; அதே சமயம் ஒரு சாதாரணமானவனைச் சாதனையாளனாக்கும். காதலுக்காக ஒருவன் எவ்வளவு தூரம் பயணிக்கிறான் என்பதை மையமாகக் கொண்டுதான் இதன் திரைக்கதை அமைக்கப்பட்டுள்ளது. ’96’ திரைப்படத்திற்கு இணையாகக் கோவிந்த் வசந்தாவின் இசை இப்படத்தில் பேசப்படும்” என்று தன்னம்பிக்கையுடன் கூறினார்.