தூக்கமின்மைக்கு எளிய வழி: நினைவாற்றலைக் காக்கும் உடற்பயிற்சியும் குட்டித் தூக்கமும்

நவீன வாழ்க்கை முறையில் ஏற்படும் தூக்கமின்மை மனிதர்களின் நினைவாற்றலையும் மூளையின் செயல்பாட்டையும் எவ்வாறு பாதிக்கிறது என்பது குறித்து பிஎன்ஏஎஸ் (PNAS) இதழில் வெளியிடப்பட்டுள்ள புதிய ஆய்வு முக்கியத் தகவல்களை வெளிப்படுத்தியுள்ளது. தொடர்ச்சியாக 30 மணி நேரம் தூங்காமல் இருக்கும் நபர்களுக்கு, சிறிய அளவிலான உடற்பயிற்சி அல்லது பகல்நேரத் தூக்கம் நினைவாற்றலைப் பாதுகாக்க உதவுவது ஆய்வில் கண்டறியப்பட்டுள்ளது.

ஆய்வின் பின்னணியும் முடிவுகளும்

ஆய்வகக் கண்காணிப்பின் கீழ் 18 முதல் 35 வயது வரையிலான 53 ஆரோக்கியமான முதிர்வடைந்த நபர்கள் 30 மணி நேரம் விழித்திருக்க வைக்கப்பட்டு மூன்று பிரிவுகளாகப் பிரிக்கப்பட்டனர். இதில் 20 நிமிட ஏரோபிக் உடற்பயிற்சி செய்த குழுவினரும், 90 நிமிடப் பகல் நேரத் தூக்கம் (Nap) எடுத்த குழுவினரும் எந்தவித இடைவெளியும் பெறாத கட்டுப்பாட்டுக் குழுவினரைக் காட்டிலும் நினைவாற்றல் சோதனைகளில் சுமார் 22 சதவீதம் சிறப்பான திறனை வெளிப்படுத்தினர். தூக்கமின்மைக்குப் பிறகும் புதிய நினைவுகளை உருவாக்கும் திறனை இந்த இரண்டு முறைகளும் ஓரளவுக்குப் பாதுகாத்துள்ளன.

வெவ்வேறு நரம்பியல் வழிமுறைகள்

மின்முளை அலை வரைவி (EEG) பதிவுகளின்படி, இந்த இரண்டு முறைகளும் மூளையில் முற்றிலும் மாறுபட்ட நரம்பியல் வழிமுறைகள் மூலம் செயலாற்றி நினைவாற்றலை ஆதரித்துள்ளன.

* பகல்நேரத் தூக்கம்: மூளையில் உள்ள தூக்க அழுத்தத்தையும் நரம்பியல் சோர்வையும் குறைப்பதன் மூலம் நினைவாற்றல் உருவாக்கத்திற்கு உதவுகிறது.

* உடற்பயிற்சி: மூளை உள்வரும் தகவல்களைக் கையாளும் மற்றும் செயலாக்கும் முறையை மாற்றுவதன் மூலம் நினைவாற்றல் உருவாக்கத்தை வெற்றிகரமாக மேம்படுத்துகிறது.

நிபுணர்களின் எச்சரிக்கையும் எதிர்கால ஆய்வுகளும்

எய்ம்ஸ் (AIIMS) நிறுவனத்தின் நரம்பியல் துறைத் தலைவர் பேராசிரியர் மஞ்சுரி திரிபாதி, ஆழ்ந்த தூக்கம் நினைவுகளை ஒருங்கிணைக்கவும், ரெம் (REM) தூக்கம் உணர்வுசார் நினைவுகளைப் பதப்படுத்தவும் உதவுவதாகக் குறிப்பிட்டுள்ளார். மறுபுறம், சீதாரம் பார்தியா அறிவியல் மற்றும் ஆராய்ச்சி நிறுவனத்தின் மூச்சுக்குழாய் மற்றும் கிரிட்டிகல் கேர் துறை இயக்குனர் டாக்டர் ஜே.சி. சூரி, இந்த முறைகள் எபிசோாடிக் நினைவாற்றலில் குறுகிய மற்றும் பாதுகாப்புப் பலன்களை மட்டுமே தருவதாகவும், முறையான மற்றும் ஆழமான 7 முதல் 8 மணி நேரத் தூக்கத்திற்கு இவை ஒருபோதும் மாற்றாக முடியாது என்றும் எச்சரித்துள்ளார்.

மேலும், விழிப்புணர்வு, எதிர்வினை வேகம் அல்லது வாகன ஓட்டுநர் போன்ற பாதுகாப்புசார் பணிகளில் இந்த முறைகளின் தாக்கம் குறித்து முழுமையாக ஆய்வு செய்யப்படவில்லை என்பதால், இது கடுமையான தூக்கமின்மை கொண்ட ஆரோக்கியமான இளைஞர்களை மட்டுமே அடிப்படையாகக் கொண்டது என்பது குறிப்பிடத்தக்கது.

கும்பகர்ணன்