குறைந்த செலவில், மிகச் குறைந்த கதாபாத்திரங்களைக் கொண்டு ஒரே இடத்திற்குள் கதையை நகர்த்தும் பாணியில் உருவாக்கப்பட்டிருக்கும் திரைப்படம்தான் ‘4 ஈடியட்ஸ்’. சஜோ சுந்தர் முருகேசன் இயக்கத்தில் வெளியாகியுள்ள இந்தப் படம், கொரோனா கால நெருக்கடியையும் மனித உறுப்பு திருட்டு என்ற சமூகப் பிரச்சினையையும் ஒன்றிணைத்து ஒரு கருத்துள்ள நகைச்சுவைப் படத்தைக் கொடுக்க முயன்றுள்ளது. ஒரு குறிப்பிட்ட லொக்கேஷனை முழுமையாகப் பயன்படுத்திய விதம் மற்றும் பிரக்யா நயனின் கதாபாத்திரம் அமைக்கப்பட்ட விதம் ரசிக்க வைத்தாலும், நகைச்சுவை என்ற பெயரில் நடிகர்கள் செய்திருக்கும் அதீத நடிப்பு படத்திற்குப் பெரும் பின்னடைவாக மாறியுள்ளது.
பங்களாவுக்குள் மாட்டிக்கொண்ட நான்கு திருடர்கள்
சென்னையின் நெரிசலான பகுதிகளில் வாழும் கிங், குயின், ஜாக், ஏஸ் ஆகிய நான்கு இளைஞர்கள் பேருந்துகளிலும் ரயில்களிலும் சிறுசிறு திருட்டுகளைச் செய்து பிழைப்பு நடத்துகிறார்கள். அப்போது பரவும் கொரோனா பெருந்தொற்று மற்றும் ஊரடங்கு காரணமாகப் பொதுப்போக்குவரத்து முடங்கி, அவர்களின் அன்றாட வாழ்வாதாரம் பறிபோகிறது. பசியைப் போக்க வழி தேடும் நால்வரும், நகரின் ஒதுக்குப்புறமான கடற்கரைச் சாலையில் உள்ள ஒரு சொகுசு பங்களாவில் கோடிக்கணக்கில் கருப்புப் பணம் இருப்பதாக அறிந்து அங்குத் திருடத் திட்டமிடுகிறார்கள்.
சுவரேறிக் குதித்து உள்ளே நுழையும் அவர்கள், அங்கிருக்கும் காவலாளி ரவி மரியாவிடம் மாட்டிக்கொள்கிறார்கள். ஆனால், அவர் காவல்துறையிடம் ஒப்படைக்காமல், பணத்தைப் பாதியாகப் பிரித்துக் கொள்ளும் ஒப்பந்தத்துடன் ஒரு நாடகத்தை அரங்கேற்றுகிறார். அதன்பின் அங்கிருந்து தப்ப முயலும்போதுதான், அந்த பங்களாவின் உரிமையாளரான மருத்துவர் வின்சென்ட் அசோகனும் காவலாளி ரவி மரியாவும் இணைந்து சட்டவிரோத மனித உறுப்பு கடத்தல் நெட்வொர்க்கை நடத்தி வருவது தெரியவருகிறது. தானியங்கி கதவுகள் பூட்டப்பட, ஆயுதமேந்திய கும்பலிடமிருந்து தங்களின் உறுப்புகளைக் காப்பாற்றிக்கொண்டு அந்த நால்வரும் எப்படித் தப்பினார்கள் என்பதேக் கதை.
சின்னத்திரையும் வெள்ளித்திரையும்: நடிகர்களின் பங்களிப்பு
நாயகனாக நடித்திருக்கும் புகழ், சின்னத்திரையில் பின்னணி சிரிப்பொலிகளுடன் சிரிக்க வைக்க செட் அப் செய்து ஸ்கோர் செய்தது போல இதில் பார்வையாளர்களைக் கவரத் தவறியுள்ளார். கதையோடு பயணிக்கும் கதாபாத்திரங்கள் மூலம் சிரிக்க வைப்பதற்குத் தேவையான அழுத்தமான சிந்தனையோ அல்லது டைமிங் நகைச்சுவையோ அவரிடம் அமையவில்லை என்பதைப் படம் உணர்த்துகிறது.
அவருடன் வரும் கும்கி அஷ்வின், திடியன், இந்திரன் ஆகியோரின் நடிப்பும் பெரிய அளவில் ஈர்க்கவில்லை. இவர்களுடன் இணைந்து காவலாளி கதாபாத்திரத்தில் வரும் ரவி மரியாவும் நகைச்சுவை என்ற பெயரில் சோதிக்கிறார். அதேசமயம், வில்லன் கதாபாத்திரத்தில் நடித்திருக்கும் வின்சென்ட் அசோகன் தனக்குக் கொடுக்கப்பட்ட வேலையை நேர்த்தியாகச் செய்துள்ளார்.
தொழில்நுட்பக் கலைஞர்களின் பணி
ஒளிப்பதிவாளர் யு.கே. செந்தில்குமார் ஒரே பங்களாவுக்குள் நடக்கும் கதையைத் தனது வண்ணமயமான கோணங்கள் வழியே பார்வையாளர்களுக்குக் காட்சிப்பூர்வமாக விருந்தாக்கியுள்ளார். சுபாஷ் முனிரத்னத்தின் பாடல்களும் பின்னணி இசையும் ஒரு வணிக ரீதியிலான திரைப்படத்திற்குத் தேவையான விறுவிறுப்பைக் கூட்ட உதவவில்லை என்பது சோகம்.
படத்தின் கடைசிப் பார்வை
ஒரு குறிப்பிட்ட இடத்தை மையமாகக் கொண்டு விழிப்புணர்வுடன் கூடிய கமர்ஷியல் படத்தைக் கொடுக்க நினைத்த இயக்குநரின் முயற்சி பாராட்டத்தக்கது. இருப்பினும், அதை நேர்த்தியான திரைக்கதையோடும் இயல்பான நகைச்சுவையோடும் கொண்டு செல்வதில் தவறியதால், ‘4 ஈடியட்ஸ்’ சிரிக்க வைப்பதற்குப் பதில் பார்வையாளர்களைச் சோதிக்கவே செய்கிறது.
ரேங்க்: 1.75 / 5