அமெரிக்க டாலர் வெளியான தினம்: உலகப் பொருளாதாரத்தின் அச்சுப் புள்ளி வரலாறு!

உலகப் பொருளாதாரத்தில் ஆதிக்கம் செலுத்தும் நாணயமாக விளங்கும் அமெரிக்க டாலர் வெளியான தினம் ஆகும். சரியாக 1785 ஆம் ஆண்டு ஜூலை 6 ஆம் தேதி, அமெரிக்க டாலர் சீரமைக்கப்பட்ட நாணயமாக அதிகாரப்பூர்வமாக வெளியிடப்பட்டு புழக்கத்திற்கு வந்தது. உலகிலேயே மிக முக்கியமான பணமாக இது கருதப்படுவதற்குப் பின்னால் சுவாரஸ்யமான வரலாறு மறைந்துள்ளது.

டாலர் என்ற பெயர் உருவான கதை:

அமெரிக்காவுக்கு டச்சு மற்றும் ஸ்பெயின் வணிகர்கள் வருவதற்கு முன்பு, அமெரிக்கப் பழங்குடி மக்களிடையே முறையான நாணய முறை வழக்கத்தில் இல்லை. டச்சு வணிகர்களால் தான் முதன்முதலில் பணம் புழங்கத் தொடங்கியது. 16 ஆம் நூற்றாண்டில் டச்சு நாணயங்கள் அமெரிக்காவிலேயே அச்சடிக்கப்பட்டன. ஜெர்மனியில் உள்ள பொஹீமியா பகுதியில் இருக்கும் ‘செயின்ட் ஜோஹிம்ஸ் தால்’ என்ற பள்ளத்தாக்கு பகுதியில் டச்சு நாட்டு வெள்ளி நாணயங்கள் அச்சிடப்பட்டன. ‘தால்’ என்றால் ஜெர்மன் மொழியில் ‘பள்ளத்தாக்கு’ என்று பொருள். அந்தப் பகுதியில் அச்சானதால், இந்த நாணயங்கள் ‘ஜோஹிம்ஸ் தாலர்’ என்றே அழைக்கப்பட்டன. நாளடைவில், இது சுருங்கி ‘டாலர்’ என்றானது.

டாலரின் மறுபிறப்பு:

காலப்போக்கில், வட அமெரிக்காவின் பெரும்பாலான பகுதிகள் பிரிட்டனின் வசம் வந்ததும், பிரிட்டன் நாணயம் புழக்கத்திற்கு வந்தது. ஆனால், பிரிட்டனிடம் இருந்து அமெரிக்கா விடுதலை பெற்றதும், தங்கள் சொந்த, சீரமைக்கப்பட்ட நாணயத்தை உருவாக்க வேண்டிய தேவை ஏற்பட்டது. இதன் விளைவாக, 1785 ஆம் ஆண்டு ஜூலை 6 ஆம் நாள் அமெரிக்க டாலர் வெளியிடப்பட்டது. 100 சென்ட் ஒரு டாலர் என்ற அளவில் இது புழக்கத்துக்கு வந்தது.

உலகப் பொருளாதாரத்தில் டாலரின் ஆதிக்கம்:

அமெரிக்க டாலர், ஐக்கிய அமெரிக்க நாடுகளின் உத்தியோகபூர்வ நாணயமாக இருந்தாலும், உலக வர்த்தகம் மற்றும் நிதியியல் சந்தைகளில் இதுவே முதன்மையான நாணயமாகும். உலகின் பல நாடுகள் தங்கள் வர்த்தக பரிமாற்றங்களுக்கு டாலரைப் பயன்படுத்துகின்றன. சிம்பாப்வே, ஈக்வடார், பனாமா, எல் சால்வடார் போன்ற 10க்கும் மேற்பட்ட நாடுகள் அமெரிக்க டாலரை தங்கள் அதிகாரப்பூர்வ நாணயமாகவோ அல்லது இணையாகவோ பயன்படுத்துகின்றன. அதன் உலகளாவிய அங்கீகாரம் மற்றும் நிலைத்தன்மை காரணமாக, இது ‘டாலர் தேசம்’ என அழைக்கப்படுகிறது.

இன்று, அமெரிக்க டாலர் வெளியாகி பல நூற்றாண்டுகள் கடந்த பின்னரும், உலகப் பொருளாதாரத்தில் அதன் ஆதிக்கம் குறையவில்லை. உலகளாவிய வர்த்தக பரிவர்த்தனைகள், மூலதனச் சந்தைகள், மற்றும் அந்நியச் செலாவணி கையிருப்பில் டாலர் தொடர்ந்து முக்கிய பங்கு வகிக்கிறது. ஜூலை 6 ஆம் தேதி, அமெரிக்க டாலரின் வரலாற்று முக்கியத்துவத்தையும், உலகப் பொருளாதாரத்தில் அதன் நீடித்த தாக்கத்தையும் நினைவுபடுத்தும் ஒரு நாளாகும்.

தனுஜா