இதய மாற்ற அறுவை சிகிச்சையின் தந்தை டாக்டர் ஜேம்ஸ் டி. ஹார்டி நினைவஞ்சலி!

பிப்ரவரி 19… நவீன மருத்துவ வரலாற்றில் ஒரு சகாப்தம் முடிவுக்கு வந்த நாள். உறுப்பு மாற்று அறுவை சிகிச்சை என்றாலே அது ஏதோ மாயக்கண்ணாடி போல வெறும் தியரியாக (Theoretical) இருந்த காலத்தில், அதைச் சாத்தியமாக்கித் தன் கைகளால் உலகிற்குப் புதிய வாழ்வைத் தந்தவர் டாக்டர் ஜேம்ஸ் டி. ஹார்டி. இன்று அவரது நினைவு நாளில், உலகமே ஒரு மாபெரும் மருத்துவ மேதையைத் திரும்பிப் பார்க்கிறது.

உலகை உறைய வைத்த முதல் சாதனைகள்

டாக்டர் ஹார்டி வெறும் அறுவை சிகிச்சை நிபுணர் மட்டுமல்ல, அவர் ஒரு தீர்க்கதரிசி. 1963-ஆம் ஆண்டு, உலகின் முதல் மனித நுரையீரல் மாற்று அறுவை சிகிச்சையை முன்னின்று நடத்தினார். அடுத்த ஆண்டே, அதாவது 1964-ல், உலகின் முதல் இதய மாற்று அறுவை சிகிச்சையைச் செய்து ஒட்டுமொத்த உலகையும் வியப்பில் ஆழ்த்தினார். மாற்றப்பட்ட நுரையீரல்கள் சுவாசிக்கும் என்றும், மாற்றப்பட்ட இதயம் துடிக்கும் என்றும் அவர் நிரூபித்தபோது, மருத்துவ உலகம் அதுவரை கண்டிராத ஒரு பாய்ச்சலைச் சந்தித்தது.

விமர்சனங்களைத் தாண்டிய வீரம்

தன்னுடைய காலத்தில் அவர் மிகக் கடுமையான விமர்சனங்களைச் சந்தித்தார். “மனித உறுப்பு மாற்றத்தில் அவசரப்படுகிறார்” என்று சக மருத்துவர்களே அவரைக் குற்றம் சாட்டினார்கள். 1964-ல் மனித இதயம் கிடைக்காத இக்கட்டான சூழலில், ஒரு சிம்பன்ஸியின் இதயத்தைப் பொருத்தி நோயாளியைக் காப்பாற்ற முயன்றபோது, “சப்-ஹியூமன்” இதயம் என்று ஊடகங்கள் அவரைச் சாடின. ஆனால், ஹார்டி எதையும் திட்டமிடாமல் செய்ததில்லை. அவர் வகுத்த கடுமையான தார்மீக நெறிமுறைகள் (Ethical Guidelines) பின்னர் மருத்துவ இதழில் (JAMA) வெளியானபோதுதான், அவரது நேர்மையும் அறிவியலும் உலகிற்குப் புரிந்தது.

மிசிசிப்பியின் பெருமை

மிசிசிப்பி மாநிலம் இனவாதம் மற்றும் வன்முறையால் தத்தளித்துக் கொண்டிருந்த காலக்கட்டத்தில், அந்த மாநிலத்தின் நற்பெயரை உலக அரங்கில் உயர்த்தியவர் டாக்டர் ஹார்டி. “மிசிசிப்பி என்பது வெறும் வன்முறைக் களம் மட்டுமல்ல, அது அறிவாற்றல் மற்றும் உலகளாவிய கருணையின் உறைவிடம்” என்பதை உலகுக்கு உரக்கச் சொன்னவர் அவர். உலகின் எந்தப் பெரிய மருத்துவமனைக்கு வேண்டுமானாலும் அவர் சென்றிருக்கலாம், ஆனால் தன் சொந்த மாநிலத்திற்காகத் தன் உழைப்பை அர்ப்பணித்த விசுவாசி அவர்.

ஆசிரியராகவும் ஆய்வாளராகவும்…

அவர் சுமார் 500-க்கும் மேற்பட்ட மருத்துவக் கட்டுரைகளையும், 23 புத்தகங்களையும் எழுதியுள்ளார். அறுவை சிகிச்சை குறித்த அவரது பாடப்புத்தகங்கள் இன்றும் மாணவர்களுக்கு வேதம் போன்றது. “நமது மாணவர்கள் அறுவை சிகிச்சை செய்யக் கற்றுக்கொள்ள வேண்டும் என்றால், அவர்கள் என்னைத் திரையரங்கில் (OR) பார்க்க வேண்டும்” என்று சொன்னவர். ஒரு ஆசிரியராகத் தன் மாணவர்களைச் சிறந்த அறுவை சிகிச்சை நிபுணர்களாக உருவாக்குவதையே தன் வாழ்நாள் சாதனையாகக் கருதினார்.

ஒரு காதலும்… ஒரு பெஞ்சும்!

டாக்டர் ஹார்டியின் மருத்துவ சாதனைகளுக்கு இணையாக அவரது மனிதநேயமும் பேசப்பட்டது. தன் அன்பு மனைவி லூயிஸ் (Weezie) அல்சைமர் நோயால் பாதிக்கப்பட்டபோது, அவரை மிகக் கண்ணியத்துடன் கவனித்துக்கொண்டார். மனைவியை அல்சைமர் பிரிவில் அனுமதித்தபோதும், தினமும் கடிகாரம் போலச் சரியாகச் சென்று அவருடன் அமர்ந்து மணிக்கணக்கில் உரையாடுவார். அவர்கள் அமர்ந்திருந்த அந்த இடம் இன்று “ஹார்டி லவ் பெஞ்ச்” (Hardy Love Bench) என்று அழைக்கப்படுகிறது. மனைவியின் நினைவாகத் தன் அரிய மருத்துவப் புத்தகத் தொகுப்புகள் அனைத்தையும் நூலகத்திற்குத் தானமாக வழங்கினார்.

முடிவுரை:

டாக்டர் ஜேம்ஸ் டி. ஹார்டி ஒரு தனிமனிதர் அல்ல; அவர் ஒரு வரலாறு. ஒரு மனிதனின் வாழ்க்கை எவ்வளவு அர்த்தமுள்ளதாக இருக்க முடியும் என்பதற்கு அவரது வாழ்க்கையே சாட்சி. மருத்துவ உலகம் இருக்கும் வரை, நுரையீரல் சுவாசிக்கும் வரை, இதயம் துடிக்கும் வரை ஜேம்ஸ் ஹார்டியின் பெயர் நிலைத்திருக்கும்.

வாத்தீ அகஸ்தீஸ்வரன்