குடியரசு தின விழாவில் ராணுவ விலங்குகள் படையின் வரலாற்று அணிவகுப்பு

புதுடெல்லி: இந்தியக் குடியரசு தின அணிவகுப்பு என்பது இந்தியாவின் ராணுவ பலத்தின் காட்சிப் பெட்டி மட்டுமல்ல, அது நம் தேசத்தின் ஆன்மாவை உலகுக்குப் பறைசாற்றும் தருணம். 2026-ல் நடைபெறவுள்ள இந்த விழாவில், வரலாற்றில் முதன்முறையாக இந்திய ராணுவத்தின் Remount & Veterinary Corps (RVC) தனது பிரம்மாண்டமான விலங்குகள் படையுடன் களம் காணவுள்ளது. சுமார் 12,600 விலங்குகளைத் தனது சேவையில் கொண்டுள்ள இந்திய ராணுவம், அந்த ஊமைப் போர்வீரர்களுக்கு அளிக்கும் ஆகச்சிறந்த கௌரவம் இது.

யார் இந்த மௌன வீரர்கள்? – படை விவரங்கள்:

இந்தியாவின் எல்லைகளைக் காப்பதில் நவீன ஏவுகணைகளுக்கு இணையாக இந்த விலங்குகளும் முக்கியப் பங்காற்றுகின்றன. அவற்றின் வியக்கவைக்கும் பணிகள் இதோ:

• பாக்ட்ரியன் ஒட்டகங்கள் (Bactrian Camels): லடாக்கின் கடும் குளிரிலும், ஆக்சிஜன் குறைந்த உயரமான மலைப்பகுதிகளிலும் சுமார் 170 கிலோ எடையைச் சுமந்து செல்லும் திறன் கொண்டவை. வாகனங்கள் செல்ல முடியாத கரடுமுரடான நிலப்பரப்பில் ராணுவத்தின் போக்குவரத்து முதுகெலும்பாக இவை உள்ளன.

• ஜான்ஸ்கர் குதிரைகள் (Zanskar Horses): இமயமலையின் செங்குத்தானப் பாதைகளில் ராணுவ வீரர்களுடன் பயணிக்கும் அதீத சகிப்புத்தன்மை கொண்டவை. குளிரையும், உயரத்தையும் ஒருசேரச் சமாளிக்கும் இக்குதிரைகள் ராணுவத்தின் அசைக்க முடியாத பலம்.

• கோவேறு கழுதைகள் (Mules): அடர்ந்த காடுகள் மற்றும் பனிமலைகளுக்குத் தேவையான உணவு மற்றும் தளவாடங்களைக் கொண்டு சேர்ப்பதில் இவை நிபுணர்கள்.

• ராணுவ நாய்கள் (Army Dogs): இவை ராணுவத்தின் ‘கண்களும் காதுகளும்’. வெடிகுண்டுகளைக் கண்டறிதல் (EDD), பனிச்சரிவில் சிக்கியவர்களை மீட்டல் மற்றும் எதிரிகளின் நடமாட்டத்தைக் கண்காணித்தல் போன்ற பணிகளில் இவை வீரர்களுக்கு இணையாகச் செயல்படுகின்றன.

• வேட்டைப் பறவைகள் (Raptors): நவீன கால ட்ரோன் அச்சுறுத்தல்களைச் சமாளிக்க கழுகுகள் போன்ற வேட்டைப் பறவைகளுக்குச் சிறப்புப் பயிற்சி அளிக்கப்படுகிறது. வான்வெளியில் ஊடுருவும் எதிரி ட்ரோன்களை இவை துல்லியமாகச் சிதைக்கின்றன.

ஏன் இந்த அணிவகுப்பு ஒரு மைல்கல்?

குண்டு வெடிப்புச் சோதனைகள், மீட்புப் பணிகள் மற்றும் எல்லைப் பாதுகாப்பு என உயிரைப் பணையம் வைத்துச் செயல்படும் இந்த விலங்குகளுக்குக் குடியரசு தின அணிவகுப்பில் இடம் கிடைப்பது என்பது, அவற்றின் அர்ப்பணிப்பிற்கு தேசம் வழங்கும் ராயல் சல்யூட்! 12,600 வீரர்களாக உருவகப்படுத்தப்படும் இந்த விலங்குகளின் அணிவகுப்பு, கர்த்தவ்ய பாதையில் ஒரு புதிய உணர்ச்சியை ஏற்படுத்தும் என்பதில் ஐயமில்லை.