கட்சி நிதி வசூலில் ‘விஸ்வரூபம்’ எடுத்த பா.ஜ.க: 6 ஆண்டுகளில் இல்லாத புதிய சாதனை!

புதுடெல்லி: இந்திய அரசியலில் அதிகாரம் ஒருபுறம் இருக்க, அந்த அதிகாரத்தைத் தக்கவைப்பதற்கான ‘நிதி பலத்தில்’ பாரதிய ஜனதா கட்சி (BJP) எட்ட முடியாத உயரத்திற்குச் சென்றுள்ளது. 2024-25 நிதியாண்டிற்கான தேர்தல் ஆணையத்தின் புதிய தரவுகள், இந்திய அரசியல் கட்சிகளிடையே நிலவும் நிதி சமநிலையின்மையை அப்பட்டமாக வெளிச்சம் போட்டுக்காட்டியுள்ளன. ஆம்.. கடந்த 2023-24 ஆம் ஆண்டில் வழங்கப்பட்ட மொத்த நன்கொடையில் 56 சதவிகிதத்தை பெற்றிருந்த பா.ஜ.க, 2024-25 ஆம் ஆண்டில் மொத்த நன்கொடையில் 85 சதவிகிதத்தை பெற்றிருக்கிறது. மீதமுள்ள அரசியல் கட்சிகள் பெற்றிருப்பது 15 சதவிகிதம் மட்டுமே. 11 ஆண்டுகளுக்கு மேலாக மோடி தலைமையிலான பாஜக அரசில் ஆட்சி செய்வதன் மூலமாக அதிகாரத்தை பயன்படுத்தி கார்ப்பரேட் நிறுவனங்களுக்கு பல்வேறு சலுகைகள் வழங்கியதற்கு கைமாறாக பா.ஜ.க. நன்கொடையை பெற்றிருக்கிறது என்ற டிபேட் கிளம்பியுள்ளது.

அசுர வளர்ச்சி: ₹6,000 கோடியைத் தாண்டிய நிதி!

கடந்த 2023-24 நிதியாண்டில் சுமார் ₹3,967 கோடியாக இருந்த பா.ஜ.க-வின் நன்கொடை, 2024-25 நிதியாண்டில் ₹6,088 கோடியாக உயர்ந்துள்ளது. இது ஒரே ஆண்டில் சுமார் 53 சதவீத வளர்ச்சியாகும். கடந்த ஆறு ஆண்டுகளில் பா.ஜ.க பெற்ற மிக உயர்ந்தபட்ச நிதி இதுவே என்பது குறிப்பிடத்தக்கது.

கார்ப்பரேட் நிறுவனங்களின் ஏகோபித்த ஆதரவு

பா.ஜ.க-விற்கு வந்துள்ள மொத்த நிதியில் 61 சதவீதம் (சுமார் ₹3,744 கோடி) தேர்தல் அறக்கட்டளைகள் (Electoral Trusts) மூலமாகவே கிடைத்துள்ளது.

• டாடா குழுமத்தின் ‘புராக்ரஸிவ் எலக்டோரல் ட்ரஸ்ட்’: சுமார் ₹757 கோடியை பா.ஜ.க-விற்கு வழங்கியுள்ளது.

• மஹிந்திரா குழுமத்தின் ‘நியூ டெமாக்ரடிக் எலக்டோரல் ட்ரஸ்ட்’: ₹150 கோடி நிதி வழங்கியுள்ளது.

• பிரூடென்ட் எலக்டோரல் ட்ரஸ்ட்: ₹2,180 கோடிக்கும் மேல் பா.ஜ.க-விற்கு வாரி வழங்கியுள்ளது.

இது தவிர சீரம் இன்ஸ்டிடியூட் (₹100 கோடி), வேதாந்தா (₹67 கோடி) போன்ற நிறுவனங்களும் பா.ஜ.க-விற்குப் பெரும் நிதி வழங்கியுள்ளன.

எதிர்க்கட்சிகள் எங்கே இருக்கின்றன?

பா.ஜ.க-வின் இந்த அசுர நிதி வளர்ச்சிக்கு முன்னால், இந்தியாவின் பிரதான எதிர்க்கட்சியான காங்கிரஸ் மிகவும் பின்தங்கியுள்ளது.

• 12 மடங்கு வித்தியாசம்: பா.ஜ.க-வின் ₹6,088 கோடிக்கு எதிராக, காங்கிரஸ் கட்சிக்குக் கிடைத்துள்ள நிதி வெறும் ₹522 கோடி மட்டுமே.

• கூட்டணி கட்சிகளின் நிலை: காங்கிரஸையும் சேர்த்து மொத்தம் 12 முக்கிய எதிர்க்கட்சிகளின் மொத்த நிதியே சுமார் ₹1,343 கோடிதான். அதாவது, ஒட்டுமொத்த எதிர்க்கட்சிகளின் நிதியை விட பா.ஜ.க 4.5 மடங்கு அதிக நிதியைக் கொண்டுள்ளது.

தேர்தல் பத்திரங்கள் ரத்து செய்தும் குறையாத வேகம்

உச்ச நீதிமன்றம் ‘தேர்தல் பத்திரங்கள்’ முறையை ரத்து செய்த பிறகும், பா.ஜ.க-வின் நிதி வசூல் குறையாமல் அதிகரித்துள்ளது அரசியல் வட்டாரத்தில் வியப்பை ஏற்படுத்தியுள்ளது. தேர்தல் ஆணையத்திடம் பா.ஜ.க தாக்கல் செய்துள்ள 162 பக்க அறிக்கையில், செக், டிடி (DD) மற்றும் வங்கிப் பரிமாற்றங்கள் மூலம் வெளிப்படையாகவே இந்த நிதிகள் வந்துள்ளதாகத் தெரிவிக்கப்பட்டுள்ளது.

அதிகாரத்தில் இருக்கும் கட்சிக்கு கார்ப்பரேட் நிறுவனங்கள் அதிக முன்னுரிமை அளிக்கின்றன என்பதையே இந்த புள்ளிவிவரங்கள் மீண்டும் உறுதிப்படுத்துகின்றன.

கடந்த 6 ஆண்டுகளில் பா.ஜ.க பெற்ற நிதி நிலவரம்: