ஒன் ஏஜ் டூ ஓல்ட் ஏஜ்ஜின் அப்டேட் தோற்றத்தைக் காட்டும் கூகுள்

குழந்தையாக குஷ்பு படம்…வளர வளர அவர் எப்படி இருப்பார் என கம்ப்யூட்டர் காட்டிக் கொண்டிருக்கும்…‘‘10 வயதில் இப்படி… 12 வயதில் இப்படி… 14 வயதில்…’’‘‘அய்யய்யோ சார்… இதுக்கு மேல கொஞ்சம் டிரஸ் போட்டு காட்டிடுங்களேன்’’ என கமல் பதறுவார். ‘சிங்காரவேலன்’ படத்தில் வரும் இந்த காமெடி சீனை வெறும் கற்பனையாகத்தான் இதுவரை கடந்து போயிருக்கிறோம். ‘இதையெல்லாம் காட்ட கம்ப்யூட்டர் என்ன கடவுளா?’ என சிலர் கமென்ட் கூட அடித்திருக்கலாம். ஆனால், இனி அது முடியாது. நிஜமாகவே குழந்தையை முதல் கிழவி வரை அச்சு அசலாக வளர வைத்துக் காட்டும் மென்பொருள் உருவாக்கப்பட்டு விட்டது, வாஷிங்டன் பல்கலைக்கழகத்தில்.

‘80 வயதில் நீங்கள் எப்படி இருப்பீர்கள்’ எனக் கேட்டபடி ஏற்கனவே ஆயிரத்தெட்டு இணையதளங்கள் உள்ளன. அவற்றில் நம் போட்டோவை அப்லோடு செய்தால், அங்கங்கே தட்டி, உருட்டிப் புரட்டி, தலைமுடிக்கு வெள்ளை பெயின்ட் அடித்து, ‘இப்படித்தான் இருப்பீர்கள்’ என அந்தத் தளங்கள் காட்டவும் செய்கின்றன. ஆனால், அவை டுபாக்கூர் என்பது பார்த்த மாத்திரத்தில் நமக்கே விளங்கிவிடும்.

‘‘வெகு காலமாக கணினித் துறைக்கு இது சவாலாகவே இருந்து வந்தது. காரணம், சிலருக்கு 5 வயது போட்டோவை 25 வயதில் எடுத்துப் பார்த்தாலே சம்மந்தமே இல்லாத யாரோ போல் தோன்றும். வேறு சிலருக்கோ 5 வயதில் இருக்கும் முகம் 50 வயதிலும் அப்படியே இருக்கும். யாருடைய வளர்ச்சி எப்படி இருக்கும் என்று யாரால் சொல்ல முடியும் என்றுதான் இத்தனை நாட்களாக நினைத்திருந்தோம். ஆனால், இந்த ஆராய்ச்சி அந்த மாயையை உடைத்துவிட்டது. குழந்தையின் கண், மூக்கு, காது, உதடு போன்றவை எந்த வடிவத்தில் இருந்தால் அது காலப் போக்கில் மாறும்… எந்த வடிவத்தில் இருந்தால் காலத்தால் மாறாதிருக்கும் என்ற பொது விதியை நாங்கள் கண்டறிந்து விட்டோம்!’’ என ரகசியம் உடைக்கிறார் இந்த ஆய்வுக்குத் தலைமை ஏற்றிருக்கும் பல்கலைக்கழகப் பேரா சிரியை கெமல்மெசர்.

இதற்காக அவர்கள் ஆயிரக்கணக்கான மனிதர்களின் சிறு வயதுப் புகைப்படங்களை சேகரித்திருக்கிறார்கள். ஒவ்வொரு வயதிலும் ஒரே மாதிரியாக போஸ் கொடுத்து போட்டோ எடுத்து வைத்திருப்பவர்களைத் தேடிப் பிடித்திருக்கிறார்கள். அந்தப் படங்களைத் துல்லியமாக ஆராய்ந்ததன் மூலம், ஒரு மனிதனின் முகத்தில் வயது ஏற்படுத்தும் மாற்றங்களை வரையறுக்க முடிந்திருக்கிறது. அந்த மாற்றங்கள் ஆணுக்கும் பெண்ணுக்கு வெவ்வேறு மாதிரி இருக்கும் என்பதும் தெளிவாகி இருந்திருக்கிறது.

‘‘அந்த இலக்கணங்களை கணினி கட்டளைகளாக்கித்தான் இந்த மென்பொருளை உருவாக்கியிருக்கிறோம். தற்போது இந்த மென்பொருளில் 6 வயதுப் பையனின் புகைப்படத்தை உள்ளீடு செய்தால், அவன் முகம் 20 வயதில் எப்படி இருக்கும், 40 வயதில், 80 வயதில் எப்படியிருக்கும் என்றெல்லாம் 30 விநாடிகளில் காட்டி விடுகிறது. இதுவரை வயோதிக மாற்றங்களை இவ்வளவு துல்லியமாக எந்த மென்பொருளும் காட்டியதில்லை!’’ எனப் பெருமிதம் கொள்கிறார் கெமல்மெசர்.

இந்த நம்பிக்கை இவர்களுக்கு சும்மா வரவில்லை. இன்றைய தாத்தா ஒருவரின் சிறு வயது போட்டோவை இந்த மென்பொருளில் இட்டு சோதித்திருக்கிறார்கள். மென்பொருள் தந்த வயோதிக ரிசல்ட், அச்சு அசலாக அந்தத் தாத்தாவின் சமீபத்திய போட்டோ போலவே இருந்திருக்கிறது.‘இந்த சாஃப்ட்வேர் கிடைச்சா குடுங்கப்பா… நம்ம ‘தல’ பொண்ணு… சூர்யா பொண்ணெல்லாம் வளர்ந்தா எப்படி இருப்பாங்கன்னு பார்க்கணும்!’ என்று உங்களுக்கே ஆர்வம் பீறிடுகிறதா இல்லையா? மக்களின் இந்த பல்ஸ் தெரிந்துதான் இணையத்தின் இமயமான கூகுள் நிறுவனமும் இன்டெல் கார்பரேஷனும் இந்த ஆராய்ச்சிக்கு பொருளுதவி செய்திருக்கிறார்கள். கூடிய சீக்கிரமே இது கூகுள் தேடுபொறியோடு இணைக்கப்பட்டு, பொதுமக்கள் பயன்பாட்டுக்கு வரலாம்! இப்படியே வளர்ந்துகிட்டுப் போனா, இன்னும் 80 வருஷத்தில் நம்ம உலகம் எப்படி இருக்கும்?